Sumekkut Qullissat tiguarpaat

Nipilersoqatigiit Sume nunatsinni illoqarfippassuarni 1974-mi tusarnaatitsisaqattaarput. Sumekkunnik filmiliortut nipilersortartut Qullissiaqqullugit kajumissaarsimavaat. Tassalu Qullissani tusarnaartitseqqarnerminnit ukiut 35-nngortullu tassani nipilersoqqilerput.
Allattoq Oline I. Olsen
juulip 05-at 2012 14:11

-Neriuppunga filmi pissanganartoq, pissutsinik takutitsiinnarani misigititsisinnaasoq, taamani qanoq issimanersoq suleqataalluni ineriartortitseqataalluni, kalaaliulluni, Inuk Silis Høegh piviusulersaarusiami takutikkusutartik pillugu taama oqarpoq.

-70-ikkuni SUMEkkut sinersorlutik tusarnaartitsisaqattaarnikuugamik, taavalu angallatinut assigiinngitsunut ilaallutik. Umiarsuarlutillu. Taava taanna ilusilersorniarlugu massakkut Sarfaq Ittummut ilaatillugit filmiliarivagut, Inuk Silis Høegh maanna filmiliornertik pillugu taama oqarpoq.

Taanna Emile Peronardilu 1960-ikkut naaneraniit 1970-ikkullu ingerlaneranni nunatsinni pisut itinerusumik paasisaqarfigerusullugit, nipilersoqatigiit SUME filmiliarissallugit ukiut marluk matuma siorna isumassarseqqaarput.  

-Pisut pingaaqisut soorlu namminersorneruleriartorneq, aatsaat mumisitsinerlu pinngornera tassani paasisaqarfigerusuttorujussuullugu. Aamma nalunagu, soorlu anaana akerliussutsimik takutitseqataasarnikoq Københavnimi, uangalu tassani barnevognemi peqataasarsimallunga, assorujussuaq paaserusullugu susoqarsimasoruna taamani?

Piviusulersaarusiortut 1960-ikkut naaneraniit 1970-ikkut ingerlanerani pissutsinik takutitsisunik assinik suli pisariaqartitsipput, ujartuinerminnilu inunnik suli attaveqarusupput.

Aamma filmitoqqat Sumekkuinnaanngitsunut tunngasut atorsinnaapput, tassa piffiit taakkua 60-ikkut naalerneranniit 70-ikkut naalernerata tungaanut nunatsinni assilisat aamma soqutigivagut.

Inuk Silis Høegh oqarpoq, Sume pillugu piviusulersaarusiap 2013-mi takuteqqaarneqarnissaa naatsorsuutigineqarpoq, filmiliortullu neriupput pissanganartumik misigisitsisinnaasumillu takutitsiumaarlutik.

-Filmip nukittoqutaa atorlugu, tassa assit nipillu atorlugit misigisitsisinnaasoq qalipaatillu atorlugit misigisitsisinnaasoq, misiginarsimanersoq taamani peqataalluni, suleqataalluni, ineriartortitseqataalluni, kalaaliulluni. Aamma nunani allani takutikkusullugu qanoq pisoqarsimanera, Inuk Silis Høegh oqarpoq.

Innuttaasut assinik filmitoqqanillu SUME pillugu piviusulersaarusiamut atukkiussinissaminnut soqutiginnittut uunga sianersinnaapput 221612-mut, imaluunniit facebookimi quppersakkami sumefilmen-imut allagaqarlutik.