Filmentusiaster får fornøjelsen af Sume-filmen med engelske undertekster.Assi: SUME-dokumentaren

Sume pillugu filmiliaq nunarsuarmi filmfestivalit annersaanni takutinneqartussanngortoq

Filminik soqutigisallit nunarsuarmit tamaneersut Tysklandimi illoqarfiit pingaarnersaanni Berlinimi filmfestivalimi "Berlinale"-mi februaarimi pisussami peqataajartortut "Sume -Mumisitsinerup Nipaa" aamma isiginnaarsinnaassavaat.

Piviusulersaarut nunatsinni filmiliani siullersaalluni festivalimi ataqqisaasumi nunarsuarmilu isiginnaariaqarnerpaasartumi  takutinneqassaaq.

- Suleqataasut sinnerlugit nuannaarpunga. Nipilersoqatigiit Sumep nipilersuusiaat taalliaallu immikkuullarissuupput inuit ikiliartuinnartut oqaasii atorlugit suliaasut.

Aamma atuaruk Sume - Mumisitsinerup Nipaa marlunnik akissarsitinneqarpoq

- Inuiaat kalaallit nunarsuup sinneranut naleqqiullugit ikitsunnguupput, taamaammat Kalaallit Nunaata oqaluttuarisaanerata nutaajunerusup pingaaruteqartup nunani tamalaani soqutigineqalersillugu saqqummilaalersisinnaagatsigu assut tulluusimaarutigaara, ilitsersuisartoq Inuk Silis Høegh taama oqarpoq.

Rockimik nipilersoqatigiit Berlinimi kangillermi saamerliuniat 1975-imi nipilersornermik festivalertitsimmata peqataapput.

- Taamaammat aamma oqaluttuarisaanermut pingaaruteqartutut oqaatigineqarsinnaavoq maanna ukiut 40-qqissaat qaangiunnerini illoqarfimmi tassanerpiaq Sume pillugit filmiliarput takutissinnaagatsigu, filmimi kreative produceriusoq, Emile Hertling Péronard, oqarpoq.

Kalaallit filmiliaat saqqummilaalersippai

"Sume - Mumisitsinerup Nipaa" Panorama-programmimik taasami peqataassaaq, tassalu filminik nutaaliorfiusunik nunarsuarmit tamaneersunik ilisarititsiffiusumi, Berlinalenimilu unammeqataasinneqartussaanngitsoq, producerip oqaatigaa.

- Filmip Berlinimi takutinneqartussanngornera Sume pillugu filmimut periarfissatsialaavoq, aammali nunatsinni filmiliornerup ukiuni makkunani ineriartupiloorfiusup nunani tamalaani saqquminerulaalernissaanut aqqutissiueqataasinnaanissaa neriuutigaarput, Emile Hertling Péronard oqarpoq.

Aamma atuaruk Isiginnaagassiaq nuannarineqartoq

Filmi Berlinimi qanoq ilassilluarneqartiginersoq misigisaqarfigerusukkukku, taava februaarip qulingani filmertarfimmi CineStarimi takuteqqaarneqartussaavoq. Tamannali ullunik pingasunik sioqqullugu  filmertarfimmi Colosseum 1-imi qaaqqusanut aamma takutinneqartussaavoq.

Filmi siornatigut Canadami Torontomi nunat tamalaat filmfestivalianni ImagineNativemi marlunnik nersornaaserneqarpoq aammalu Danmarkimi filmit pillugit nittartakkamit CPHculture.dk-mit 2014-imi piviusulersaarusiarineqartut pitsaanersaattut toqqarneqaqqammerluni.

 

"Sume - Mumisitsinerup Nipaa" Berlinimi ulluni makkunani takutinneqassaaq:

07.02.2015                     15:30                            Colosseum 1 (Immikkut qaaqqusanut)

10.02.2015                     17:30                            CineStar 7 (pisortatigoortumik takuteqqaarnera)

11.02.2015                     12:00                            CineStar 7

12.02.2015                     14:00                            Kino International

15.02.2015                     17:30                            Cubix 7

 

Filmi tuluttut ataatigut oqaasertalersorlugu takutinneqassaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat