Sume pillugit filmi pisiarineqarsinnaalissaaq
'Sume - Mumisitsinerup nipaa' DVD-nngorlugu saqqummertussanngorpoq. DVD-it 2.000-init sinneqalaartut Atlantiku ikaarlugu maanna angallanneqarput ullumilu sinerissami sumiiffinnut arlalinnut apuunnissaa naatsorsuutigineqarpoq.
Ilassutit isiginnaagassiat nalunaaquttap akunnera affaanik sivisusseqartut
DVD, piviusulersaarutip saniatigut, aamma immiussanik pisoqqanik nutaanillu imaqarpoq. Ilaatigut nipilersoqatigiit Sume ukiunik 40-nngortorsiornerminnut atatillugu Katuami 2010-mi decembarip 20-ani tusarnaartitsinerat aamma nipilersoqatigiit illoqarfimmut aamarsuarsiorfiusimasumut Qullissanut 2012-imi aasakkut angalanerat.
Danmarkimi kalaallit illuutaanni aamma Københavnimi Nordatlantens Bryggemi pisiarineqarsinnaassaaq, tuniniaasussallu allat filmip Facebookimi nittartagaani ingerlaavartumik nalunaarutigineqartassapput.
