Sume - Mumisitsinerup Nipaa Berlinimi nuannarineqarluarpoq
Piviusulersaarut Sume - Mumisitsinerup Nipaa, Berlinemi takutinneqarmat nunat allamiunit alutorineqarlunilu nuannarineqartoq, filmiliortoq Inuk Silis Høegh tulluusimaaqaluni oqarpoq. Aammalu oqarluni, Nunatta oqaluttuarisaanera isiginnaartunit soqutigineqarlunilu pissarsiaqaatigineqarsimasoq.
-Ingerlalluartorujussuuvoq, ippassaani filmiarput takuteqqaarneqarpoq tassani filmertarfik ulikkaarpoq, tassalu soqutigineqartorujussuulluni, uagut naggaatigut apersorneqarluta isiginnaartuninngaanniit aamma malunnarpoq soqutigisorujussuugaat
Inuk Silis Høegh oqarpoq.
Piviusulersaarut Sume - Mumisitsinerup Nipaa, Nunatsinni septemberimi takutinneqaqqaarpoq. Taannalu nunani assigiinngitsuni film festivalini assigiinngitsuni ataasiinnaanngitsumik nersornaasigaalluni.
Aamma atuaruk Sume pillugit filmiliaq nunarsuarmi filmfestivalit annersaanni takutinneqartussanngortoq
Nunatta oqaluttuarisaanera nunarsuarmioqatitsinnit ilisimaneqanngeqisoq, filminngorlugu avammut takutinneqarnerani tamanna qanoq qisuariartoqassanersoq, Inuk Silis Høeghip pissanngatigisimavaa.
-Pissagaginikuugakku sumi tamaani isiginnaarneqarsinnaanersoq, imatut nunarput qanoq ittuunersoq ilisimasaqarfiginngikkaluarlugu, paasinarsivoq kikkulluunniit isiginnaarsinnaagaat pissarsiaqarfigalugulu, nuannaarnaqaaq.
Inuk Silis Høegh oqarpoq.
Aamma atuaruk Sume - Mumisitsinerup Nipaa marlunnik akissarsitinneqarpoq
Taassuma aamma ilimagaa, film festivaalit assigiinngitsut piviusulersaarut suli soqutigigaat, neriullunilu piviusulersaarut festivalini assigiinngitsuni takutinneqarumaartoq.
-Neriuppugut soqutigineqarluassasoq, pisiarineqarnissaanut imaluunniit filmfestivalinut allanut ingerlaaqqinnissaanut.
Inuk Silis Høegh aamma oqarpoq filmilioqqissamaarlutik, sumulli tunnganersoq oqaatigisinnaanngikkallarnerarlugu.
Piviusulersaarut Sume - Mumisitsinerup Nipaa, nunanit allanit suli pisiarineqarsimanngitsoq, Inuk Silis Høeghip maannakkut Danmarkimut utereersup erseqqissaatigaa, neriuutigaluguli qanittukkut soqutiginnittut tutsiukkumaartut.
Berlinimi Sume - Mumisitsinerup Nipaa pingasoriarlugu takutinneqarpoq, isiginnartarfillu isiginnaarianik ulikkaaqattaarsimavoq, kingornalu nuannarinnittut ornigullutik apersoriartortarsimavaat.
Berlinimi filmfestivalimi kalaallit filmiliaat allat takutinneqartut tassaapput, "Oqarit Inuullutillu" aamma "ANORI", taakku Pipaluk K. Jørgensenimit filmiliarineqartut."Qaqqat Alanngui" aamma "Unnuap Taarnerpaaffiani" Tumit Productionimit filmiliat,
"Small Time Giants", taanna Aka Hansenip filmilaa aamma "Nuummioq" Otto Rosingimit filmiliarineqartoq.