Sulorarnermi akiniaasoqarpoq

Iidui Broberg Aasianni ABK-meersoq sulorarnermi Qeqertarsuup tunuani pissartanngorniunnermi ajugaavoq pissanganartumik finale ingerlanneqareersoq.
Allattoq Noah Mølgaard
februaarip 20-at 2012 10:29

Qeqertarsuup tunuamiut pissartanngorniunnerat Ilulissani ingerlanneqarpoq sapaatip akunnerata naanerani unamminerit 163-it ingerlanneqarlutik.

Arnat angutillu inersimasut ataasiakkaarneranni finalet naligiiffiupput. Arnanilu marloriaammik akiniaasoqarpoq. Tassani unammipput Iidui Broberg ABK Aasianniit aamma Juliane Brønlund JBF Ilulissaniit.

Juliane Brønlundip siunissamut neriulluarfigineqartoq Iidui Broberg Qeqertarsuarmi peroriartortoq siorna GM-mi ajorsartippaa. Taakku aamma Ilulissani imminnut unammeqqipput unamminernilu aallarniutaasuni Juliane Brønlund 21-16, 21-16-mik ajugaavoq.

Taakku finalemi imminnut unammeqqipput tamatumuunalu Iidui Broberg ajugaavoq misilittagartooq 46-nik ukiulik 19-21, 21-11 aamma 23-21-mik ajugaaffigalugu. Iidui Broberg sætit pingajuanni siuaqqalluaraluarpoq, unamminerli naammassingajalersoq unittoortuusiagaluarpoq angutikkaluarlunilu.

- Kisianni tassa oqaatigisinnaannguatsiarparput arnat inersimasut eqqarsaatigalugit Qeqertarsuup tunuani kinguaariit nikittut, sulorartartut kattuffianni GBF-mi siulittaasoq Michael Kleist KNR-imut oqarpoq.

Juliane Brønlund ukiut qulikkaat arlallit nunatsinni sulorartartuni pikkorinnerit akornanniissimavoq aammalu siorna GM-qarmat sølvinnattuulluni. Qeqertarsuarmiulli inuusuttut ukiut kingulliit malunnartumik unammilleriartulersimapput.

Iidui Broberg Qeqertarsuup tunuani pissartanngorniunnermi akiuulluarnerpaatut toqqarneqarpoq Cecilie Hansen JBF-imeersoq inuuusuttuni akiuulluarnerpaatut toqqagaasoq.

Hansigne Broberg Arctic Winter Gamesimut peqataasussat akornanniittoq inersimasuni pissuserissaartutut akissarsitinneqarpoq inuusuttuni Patrick Jensen JBF-meersoq pissuserissaartutut akissarsitinneqartoq.

Angutit ataasiakkaarneranni finale aamma pissanganarpoq JBF-meersut Karl Jakob Thomassen aamma Ukatu Kristensen tassani unammimmata. Sæt-imi siullermi Ukatu Kristensen 21-19-mik ajugaangaluarpoq, qasulernerli takkummat sætit aappaanni pingajuannilu Karl Jakob Thomassen 21-12-mik aamma 21-16-mik ajugaavoq.

Ukatu Kristensen aamma kultinnappoq angutit iligiiaarneranni Michael Kleist iligalugu ajugaangamik Karl Jakob Thomassen aamma Hans Henrik Helmann 21-18 aamma 21-13-mik ajugaaffigalugit. Michael Kleistilu suli kultinnaqqippoq arnat angutillu iligiiaarneranni Juliane Brønlund iligalugu ajugaangamik Ukatu Kristensen aamma Luuiisa Hansen 21-10 aamma 21-12-mik ajugaangamik. Iidui Broberg aamma Hansigne Broberg arnat iligiiaarneranni ajugaapput.

Linki ataaniittoq toorlugu angusat aasinnaavatit.