Sulorarneq: Semifinalenut piareerput
Unammisartut sisamat B-67-meersut angutit ataasiakkaarneranni semifinalemut anngupput. Tassaapput Frederik Elsner semifinalemi Mads Nyvoldimut unammisussanngortoq, semifinalep aappaani Taatsi Pedersen Jens Frederik Nielsenimut unammissapput.
Taamaattorli Taatsi Pedersen kvartfinalemi Ukatu Kristensenimit JBF Ilulissaneersumit ilungersuatinneqalaavissorpoq. Taatsi Pedersen unamminermi tassani ajugaavoq sætini 2-1-mik 21-10, 17-21 aamma 21-17-mik. Unamminermi tassani pikkunavimmik pointit unammissutigineqaqattaarput unammineq marlunngornermi unnukkut qulinngoriartortoq ingerlanneqarmat.
Arnat inersimasut ataasiakkaarneranni semifinalertussat aamma piareerput. Juliane Brønlund JBFimeersoq semifinalep aappaani Ivalo Olsenimut B-67imeersumut unammissaaq, semifinalellu aappaani unammissapput B-67-meersut Sara Lindskov Jacobsen aamma Anja Skov Kjeldsen.
Arnat inersimasut iligiiaarneranni aamma semifinalemut piareerput. Semifinalemi unammissapput Ivalo Olsen/Anja Skov Kjeldsen B-67imeersut unammissallugit Naujalisa Egede/Rita Stidsen B-67imiit aamma Tennisklubben Qaqortumeersut. Semifinalep aappaani unammissapput Juliane Brønlund/Tina Madsen JBFmeersut unammissallugit Sara Lindskov Jacobsen/Susanne Walbohm B-67meersut.
Angutit inersimasut iligiiaarneranni semifinalemut aamma piareerput. Tassani unammissapput Mads Nyvold/Ib Falck Petersen aamma Frederik Elsner/Mininnguaq Kleist tamarmik B-67meersut. Semifinalep aappaani unammissapput Jacob Isbosethsen/Toke Hansen aamma Jens Frederik Nielsen/Taatsi Pedersen tamarmik aamma B-67meersut.
Pingasunngornermi arnat angutillu akuleriillutik unammissapput semifinalellu ingerlanneqassapput sisamanngortumi illernartumi.
Inernerit uani takukkit