Sulorarneq: Pissartanngorsinnaasut pingasuupput

Sulorarnermi GM ullumi Sisimiuni aallartissaaq. Frederik Elsner angutit ataasiakkaarneranni siorna pissartaavoq arnallu ataasiakkaarneranni siorna Sara Lindskov Jacobsen pissartaalluni. Siunissamut neriunaateqarluartut Jens  Frederik Nielsen aamma Taatsi Pedersen maanna ukioq ataaseq Danmarkimi najugaqareerput ukiullu ingerlannerani annertuumik sungiusarlutillu amerlaqisunut unammisarsimapput.

- Apeqquterujussuuvoq Frederik Elsner angutit ataasiakkaarneranni unammillersinnaassaneraat, nuna tamakkerlugu sungiusaasoq Bjarne Nielsen oqarpoq, taassumalu inuusuttut taakku marluk Danmarkimi ukioq tamaat malittarisimavai.

- Kisianni sulorarnermi ineriartorneq eqqarsaatigalugu ukioq ataaseq sivikitsuararsuuvoq piffissangaatsiaq aatsaat ingerlareeraangat sungiusartuarneq malunniuttarpoq, oqarpoq.

Siornatigut angutit ataasiakkaarneranni pissartaq Bror Madsen JBF Ilulissaneersoq unammisartutut maanna uninngagallarpoq taamalu GMip nalaani maqaasineqassalluni.

- Assut qilanaarsimagaluarpunga Bror Madsenip unamminissaanut. GMip nalaani maqaasissaqaara, Frederik Elsner oqarpoq.

Taassuma nammineq pissanngatigaa inuusuttut ataasiakkaarnermi unammillersinnaassaneraanni.

Qularinngilara unamminerit aallartippata sukataassaqisut. Taamaammat eqqissisimaniarsinnaaneq apeqqutaajumaarpoq. Unamminissat siumut suli oqaatigiumininaapput. Atagu qanoq pisoqassanersoq takulaarallartigu, Frederik Elsner qasujaassutsimigut siornatut inissisimasoq oqarpoq.

Angutit ataasiakkaarneranni Mininnguaq Kleist iligissavaa qularnanngilarlu Jens Frederik Nielsenimi aamma Taatsi Pedersenimi unammillerneqarluarumaartut.

Arnat ataasiakkaarneranni Sara Lindskov Jacobsen pissartanngussagatinneqarpoq. Siornatigut arnat ataasiakkaarneranni pissartaq Mille Kongstad ukiup ataatsip matuma siorna ajoqusertoq suli unammisaleqqinnissaminut piariinngilaq.

Sulorarnermi GM porskip ullua naggaserneqassaaq.