Sulorarneq: Ilimagisat ajugaapput

Ataasiakkaarluni finaleni tamaginni unamminerit pissanganarsinngitsoorput pissartanngorniunnerit tallimanngortumi tannaartumi Nuummi naggaserneqarmata.

Peqqutissaqarluarporli Sara Lindskov Jacobsenip B-67-meersup siunissami isumalluarfiginissaanut taannami arnat ataasiakkaarneranni nunatsinni pissartanngorpoq. Finalemi unammivaa 45-nik ukiulik Juliane Brønlund JBF Ilulissaneersoq inuusuttunut pikkorissunut arlalinnut ajugaareerluni finalemut annguttoq. Finalemili Sara Lindskov pisassaanngivippoq 21-11, 21-11-mik ajugaangami.

Juliane Brønlundili aamma pissartanngorpoq arnat iligiiaarneranni Tina Madsen pissartanngoqatigigamiuk ajugaaffigalugit Anja Skov Kjeldsen aamma Ivalo Olsen B-67-meersut.

Angutit
Frederik Elsner angutit ataasiakkaarneranni pissartanngoqqippoq klubbeqatini Jens Frederik Nielsen finalemi ajugaaffigigamiuk 21-10, 21-15-mik.

Frederik Elsnerilu suli pissartanngoqqippoq angutit iligiiaarneranni Mininnguaq Kleist pissartanngoqatigigamiuk finale-mi ajugaaffigalugit Jens Frederik Nielsen aamma Taatsi Pedersen.

Arnat angutillu akuleriillutik iligiiaarneranni pissartanngorput Mininnguaq Kleist aamma Susanne Walbohm finale-mi Karl Jakob Thomassenimut Tina Madsenimullu JBF-imeersunut ajugaangamik 23-21, 23-21-mik.

KNR-radio poorskikkunni pissartanngorniuttunit aallakaatitseqqissaaq poorskip ulluata aappaani nalunaaqutaq 17.30-miit.

Inernerit uani takukkit (PDF)