Sulluliarsuit imaatigut kabeli illersorsinnaavaat
- Kabelit saviminernik illersuuteqaraluartut tamanna naammassimanngilaq, Steen Hansen oqarpoq.
Ajornartorsiut qillerinikkut qaangerneqarsinnaavoq, tassa Nuup kujataatungaani 250 meterinik ititigisumi 1.200 meterinik takitigisunik marlunnik sullulioraanni. Aqqartartut ungasianiit aquttakkat kabelit taakku sulluliakkut siunissami imusalissagaluarpaat, Steen Hansen oqarpoq.
Suliassamut annertuumut Tele Greenland suliariumannittussarsiueqqammerpoq. Akisoorujussuusussaavoq. Sulluliorneq 20 millionit koruunit 50 millionit koruunillu akornanni akeqassasoq, Steen Hansenip nalilerpaa.
Sulluliornissarli tuaviuuttariaqarpoq. Oktobarinngortinnagu naammassisariaqarpoq, silaginnissaami pisariaqarpoq, silarluttumi immap naqqani qillerisoqarsinnaanngimmat - ilulissat upernaakkut aamma tissukalersarmata.
- Periarfissat allat misissoreeraluarpavut. Soorlu kabelit ujarappassuarnik qallerneqarsinnaanerat. Taamaaliussaguttali ima pisoqarataannaavoq: Ujaqqat ilulissat kivitissinnaavaat, taava ajornartoriutivut suli annertunerulissapput, Steen Hansen naliliivoq.
Sulluliorluni qillerineq juunimi aallartissinnaassasoq Steen Hansenip neriuutigigaa, atuagassiami Ingeniørenimi allaaserineqarpoq.