Sullualukkoortoqarsinnaalerpoq

Canadami naalakkersuisut siku pillugu qullersaqarfiata Sullualuk angallavigineqarsinnaalersoq sapaatip akunnerata ingerlanerani nalunaarutigaa. Sullualuk sikuerutivissunngikkaluartoq sikut avaqqutaarlugit ingerlasoqarsinnaalerpoq. Tamassuma takutippaa Canadap sineriaata allanngoriartulernera, kiisalu umiarsuit assartuutit takornarniartaatillu angalsinnaalersut. Kangisinnerusumi suli sikoqaalukkaluartoq kippasinnerusortaa sikuerutilerpoq. Luc Desjardins, Canadami sikunik alapernaarsuiffimmiit nalunaarpoq, Sullualuk qaammat ataaseq qaangiutinngitsoq ikaarneqarsinnaalissasoq, sikuli aalaakkaasimasoq aakkarterluni maanna siaruaammat angallanneq suli navianartoq.

Sikunik apummillu USA-mi alapernaarsuiffimmiit nalunaarutigineqaqqammivoq siku pisarnermiit ukioq maanna annikinnerujussuanngussasoq. Alapernaarsuiffimmit aamma nalunaarput siku 14 kvadratkilometerisut upernaaq isorartutigisimagaluartoq maanna 6,5 kvadratkilometeriinnanngorsimasoq, qaammatillu ingerlanerani suli milliartussalluni. Sullualuup ingerlavigineqarsinnaalernera suliffeqarfiit inuillu namminneq angallatillit soqutigisimaqaat. Canadami umiarsuarnik nakkutilliisut nalunaarutigaat angallatit 50-it missaanniittut Canadap avannaani maannakkorpiaq angalasut, taakkunanngalu qulit aqqaneq-marlulluunniit tasaasut inuit namminneq angallatiminnik Sullualukkut ikaarniarsarisut. Ilanngulluguli nalunaarutigaat tamaani angalaniarneq suli navianartoq.