Sullualuk Canadap oqartussaaffigilerusuppaa
Umiarsuit annerit tamarmik Sullualukkoornialeraangamik Canadamiut sinerissamik alapernaarsuisuinut nalunaarutigisalissavaat. Canadap ministeriunera Stephen Harper taama piumasaqaateqarpoq.
Allattoq Louise M. Kleemann
aggustip 29-at 2008 08:12
Taama oqariartuuteqarneq USA-mit iluarineqanngilaq, imartaq pineqartoq nunat tamat oqartussaaffigigaat USA-p oqariartuutigivaa.
Stephen Harperilli erseqqissaatigaa imartaq tamanna Canadamit oqartussaaffigineqartoq. Tamaani uuliaqarfiullunilu naturgasseqarfiungaatsiarnissaa ilimagineqarpoq.
- Taamatut iliuuseqarneq nunarsuarmioqatitsinnut sakkortuumik oqariartuuteqarnerussaaq, Stephen Harper oqarpoq. Canadami inatsisartunut qinersisoqarnissaa taassuma ulluni qaninnerni nalunaarutigissagaa ilimagineqarpoq.
Nunat assigiinngitsut pisuussutit tamaani nassaassaagunartut pillugit saqitsaattuarsinnarput. Rusland, USA, Canada, Norge aamma Danmark issittup imartaanik oqartussaaffeqarnertik maanna ilaatigut oqariartuutigaat.
