Sullualuk aqqutigineqarsinnaalerpoq
1978-imili qaammataasamit nalunaarsuisoqarsinnaalermalli, siullermeersumik umiarsuit Canada avannaqqullugu Sullualuk aqqutigisinnaaleraat takuneqarsinnaalerpoq. Sullualuk tassaavoq ikerasak Nunatta kitaata avannaaniit Canada avannaqqullugu Beringsstrædimut, tassa ikerasammut Alaskap Siberiallu akornanniittumut aqqutigineqarsinnaasoq.
Europamiut avataarsualiarnermik ingerlatsiviata ESA-p avatangiisinut misissuissutaata, Envisat-ip, assilisai naapertorlugit sikunik ajornartorsiuteqarani Sullualuk aqqutigineqarsinnaalersoq uppernarsarneqarpoq.
Qalasersuarmi sikup annertussusaata 3 million kvadratmeterit missaannut milleriarsimanera Danmarks Rumcenterimi lektorip, Leif Toudal Pedersenip oqaatigaa. Tassa sikup aakkiartornera ilimagisamit sukkanerujussuusoq oqaatigaa.
- 2005-imi aamma 2006-imi Qalasersuarmi sikup minnerpaaffiinit ullumikkut siku 1 million kvadratkilometerinik milleriarsimavoq. Ukiup ataatsip ingerlanerinnaani taama annertutigisumik milleriarnera ingasaginaqaaq. Taama sukkatigisumik milliartorneranut pissutaasut maannakkorpiaq paasissallugit pisariaqartipparput, Leif Toudal Pedersen tusagassiuutinut nalunaarummini taama allappoq.
