Sullivinnik Nakkutilliisut ajunaarneq misissussavaat

Canadamiu Nanortallup eqqaani kuultisiorfimmi Nalunaq-mi unnuaq ajunaarpoq. Ilimagineqarpoq qamussuit assartuutit qitermikkut napisartut aquttarfiannit ujarassiorfimmi sulisoq aniniartilluni qamussuit napitittussanngortittoorsimassagai - aqqarnerminilu kiggigussaasimassalluni.

Ajunaarnerli taamatorpiaq pisimassanersoq suli qulakkiivinneqanngitsoq, Nalunami kuultisiorfimmi pisortaasoq Erik Andersen nassuiaavoq.

-Ajunaarnermut isiginnittoqanngilaq. Angut ajunaartoq nalinginnaasumik suliaminik ingerlatsisilluni ajutoorsimavoq, Erik Andersen qarpoq, nangillunilu.

-Sulisut marlukkaartuartarput, pisulli nalaani aappaa eqqaaniissimanngilaq. Ajortoqartoq pasitsaakkamiuk, suleqatimi qamussuit ingerlataasa maskiinaa unitsikkasuarpaa, kingusinaarlunili. Angut Canadamiu gummiged-ini kiggigussaasimavoq, toqqutigisaminik.

Nanortallip eqqaani kuultisiorfimmi ajutoorneq toqumik kingunilik qaarusuliap iluani ullaaq pingasut missaani pisimasoq, sulisitsisut sinnerlugit oqaaseqartup ilisimatitsissutigaa.

Erik Andersen aamma oqarpoq kuultisiorfimmi sulineq tamarmi uninngagallartoq, qaqugu aallarteqqinnissaa suli oqaatigiuminaalluni.

Nanortalimmi politiit maannamut misissuinerisa takutippaat, angut Canadamiu nammineq ajunaarutigisaminik iliuuseqartoorsimasoq.

Pisoq Sullivinnik Nakkutilliisoqarfiup maanna nalilersuiffigisussanngorpaa. Paasiniarneqassaaq ajutoornermut atatillugu sullivinnik isumannaallisaanermi maleruagassat unioqqutinneqarsimanersut.

Nalunami kuultisiorfik qaammatit qulingiluat matuma siornagut aamma ajutoorfiuvoq, taamani angut dumperinik ingerlatsisoq kinngusoorluni silammut erfagiussaammat.