Sullivinni isumannaallisaaneq nutarterneqarpoq

Nunatsinni suliffinni sulinermilu isumannaallisaanikkut inatsit nutarterniarlugu Folketingimi ippassaq siullermeerneqarluni oqaluuserineqarpoq.

Suliffinni sulinermilu isumannaallisaanikkut inatsit ukiut 19-nit matuma siorna inatsisiliaavoq.

Inatsit nutartigassaq suliffissaqartitsinermut ministerimit Claus Hjort Frederiksenimut saqqummiunneqarpoq, inatsimmilu piniartut aalisartullu ilanngunniarneqarput.

Suliffeqarfinni sulisut sillimaniarnermut peqqinnissamullu naliliisoqartalernissaa aamma inatsimmut ilanngunniarneqarpoq. Meeqqallu aatsaat 13-nik ukioqaleraangata sulisinnaanngortinneqassapput, taamaallaat piniarneq aalisarnerlu pinnagit.

Suliffiassaqartitsiniarnermut ministerimit erseqqissarneqarpoq Folketingi inatsisartullu nunatsinni suliffinni atugarisat pitsanngorsartuarnissaat qulakkeertuartariaqaraat.

Folketingimi ilaasortap Kuupik Kleistip (IA) Folketingip oqaluttarfianiit oqaluuserisap aappassaaneerneqannginnerani

suliffissaqartitsiniarnermut ataatsimiititaliap sulisartut kattuffii tusarniartariaqarai kaammattuutigaa.