Sullivimmi avatangiisit pillugit akisussaanerup agguataarnera nutaaq

Sullivimmi avatangiisit pillugit akisussaaneq sulisitsisumiiginnarunnaarpoq. Aamma sulisut annertuumik mianersuaalliornikkut sullivimmi avatangiisit pillugit inatsimmik unioqqutitsisut akisussaatinneqarsinnaalerput.
decembarip 20-at 2012 08:55

Inatsisip allanngortinneqarnerata Folketingimi ippassaq akuersisutigineqartup tamanna kingunerissavaa. Tamanna sioqqullugu sullivimmi avatangiisit pillugit inatsit nutaaq Inatsisartuni suliarineqarlunilu akuersissutigineqareerpoq.

Inatsit nutaaq naapertorlugu sulinermi ajutoortoqartillugu sulisitsisut, sullivimmi pitsaasunik isumannaatsunillu avatangiiseqartitsinissaq sapinngisaq tamaat qulakkeerniarsimagunikku, akisussaatitaanerat annikillineqarpoq. Peqatigitilluguli sulisitsisut peqqissaarussinnginnerat pissutigalugu toqusoqarsimatillugu imaluunniit annertuumik ajutoortoqarsimatillugu akiliisitsissutit marloriaatinngortinneqarput.

Kalaallit Nunaanni sanaartornerup iluani ataqatigiissaarisunut sullivimmi avatangiisit pillugit ilinniartitaanermik, Danmarkimi pioreersumut assingusumik, pilersitsisoqarnissaa inatsimmi aamma naqissuserneqarpoq.

Enhedslisten partiini kisiartaalluni inatsimmik itigartitsilluni taaseqataavoq. Inatsimmi allannguutaasoq 2006-imilu eqqunneqartoq akerleralugu taamaaliorput. Taamaammat aamma inatsimmut allannguutissaq Kalaallit Nunaannut atuuttussaq itigartillugu taaseqataapput. Inatsisissatut siunnersuutip taarsissutigineqarnerani 102-nit akuerinearluni arfineq pingasulluni itigartinneqarluni akuerineqrpoq. Januaarip aallaqqaataani atuutilissaaq.

Sinerissap avataani sulineq inatsimmi nutaami ilaatinneqanngilaq, aatsitassarsiornermut akisussaaffeqarfik Namminersorlutik Oqartussat ataaniimmat, sullivinnili avatangiisit pillugit inatsisiliorneq Danmarkimit suli akisussaaffigineqarpoq.