Sulliviit soqutigineqarluartut

Namminersornerullutik Oqartussat suliffeqarfippaaluillu sapaatip akunnerata naanerani sullivinnik Odensemi Aalborgimilu ussassaaripput, ilinniartut ilinnikkaminnik naammassinnikkunik Kalaallit Nunaannut uteqqinnissaat siunertaralugu. Ussassaarisut Odensemut ippassaq ingerlaqqipput, tassanilu alakkaasut ilagaat Jonas Jensen, februarimi issittumi ingeniørinngortussaq. Taannali ilinniarnerminik naammassinnikkuni ingerlaannaq atorfinissamaannginnerarpoq.
novembarip 17-at 2008 14:50

- Ukiut marluk Norgemi kandidatimut atuarnissara naatsorsuutigaara. Geoteknikkimut tunngasut aalajangiullugit ingerlakkusuppakka. Bacheloritut naammassiguma Norgimi atuarnera nangissavara, Jonas Jensen oqarpoq.

Københavnittaaq Universitetiani Jonas Petersen ujarassiuunngorniarluni atuartoq Odensimi peqataavoq.

- Aatsitassaqarnermut allaffimmiittut Greenland Mining Servicemeersullu maannarlunga oqaloqatigaakka, maannarninnut Kalaallit Nunaanni praktikkersinnaanissara soqutigalugu paasiniaavunga taamaalillunga qanoq attaveqarfiginninnissaq paasilluarpara, Jonas Petersen oqarpoq.

Suliarisassanik akisussaasoq, aningaasaqarnermut inunnillu aqutsisoqarfimmi pisortaq Hans Christian Sværd ippassaq sullivinnik ussassaarinermi aggiasoqarluarsimanera unnersiutigaa.

- Odensimi Aalborgimilu sullivinnik nittarsaassineq ingerlalluaqaaq. Siullermik Københavni Århusilu ingerlatsinitsinni piffigisaratsigit, aatsaat siullermik Odense Aalborgilu ingerlatsiffittut atorpagut. Ullumi inatsisilerituut pingasut suliffinnik soqutiginnillutik nalunaarput, taamaammat ingerlalluaqaaq, Hans Christian Sværd oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq