"Sullissivik Nuuk" ullumi nalilersorneqassaaq
Nuummi suliffissaaleqisut suliffissarsiuussisarfimmut allatsiinnartarnerat qimanniarlugu, suliffeqanngitsullu ataavartumik suliffeqalernissat anguniarlugu Nuup kommuneata siorna pilersippaa ”Sullissivik Nuuk”. Suliffeqarfiup aallartinnerminiit ullumimut angusai kommunalbestyrelsep ullumi ataatsimiinnerani naliliiffigineqassapput.
”Sullissivik Nuuk”-p siunertaaraa, Nuummi suliffeqanngitsut ataavartumik suliffeqalernissaat.
”Sullissivik Nuuk” aallartimmalli suut iluatsinnersut suullu iluatsinngitsut Nuup Kommunalbestyrelseata ullumi nalillersussavai.
Sullissiviullu aallertisarneqarnera ajornaatsuinnaasimanngilaq, inatsisitigut qanoq tunngavissaqartiginera ilaatigut apeqquserneqarsimalluni. Kommuneqarfinnik Nakkutilliisoqarfik naliliivoq suleqatigiinnissamut isumaqatigiissutip ilaa kommunit aqunneqarnerannut inatsimmut naapertuutinngitsoq.
Isumaqatigissutaavoq suliffeqarfiup namminersortup Inulerisut Aps-ip pisortaa Jens Lyberth ”Sullissivik Nuuk”-mik ingerlatsisuussasoq, Jens Lyberth-illu ingerlatsisunngortinneqarnera inatsisinut naapertuutinngitsutut nalilerneqarpoq, kommunimi akisussaaffimmik annertuumik tigummiaqassaguni pinngitsoorani kommunimi atorfeqartariaqartoq tikkuarneqarluni, kommunep oqartussatut suliaminik avataaniittunut tunniussisinnaatitaannginnera tunngavigalugu.
Kommuneqarfiit Nakkutilliisoqarfiata aamma erseqqissarpaa Sullissiviup Nuup naatsorsuutai allanut suliakkiissutigineqarsinnaanngitsut. Inatsisit saniatugut Kommunalbestyrelsep nalilersussavaa sullissiup aallartisarneqarnera.
”Sullissivik Nuuk”-p nalunaarutigaa Nuummi suliffeqanngitsunit neqeroorfigineqartunit 150-init 15-iinnaat ataavartumik maannamut suliffissaqalersimasut. Suliffeqanngitsunik piukkunnarsanerup ilimagisamit nukinnik annertunernik atuiffiusimanera, kiisalu ”Sullissivik Nuuk”-mi sulisunik piukkunnarsaanerup nukinnik aamma atuiffiungaatsiarsimanera tamatumunnga pissutaatinneqarput.
”Sullissivik Nuuk” siorna marsip 1-ianni Nuummi kommunalbestyrelsemit suliffeqarfinnillu namminersortunit Inulerisut Aps-imit Ramsdal A/S-imit atsioqatigiissutigineqarpoq.
Nunatsinni Naatsorsueqqissaartarfiup suliffeqanngitsunik kisitsisaatai naapertorlugit Nuup kommuneani ullumikkut suliffeqanngitsut 400-it 500-llu akornanniipput.
