Sullissivik Nuuk amerlanernit akuerineqarpoq
Asuli oqalunneq imaluunniit siumut isigisumik nalunaarusiaq? Nuummi suliffeqanngitsut allatsiinnartarnerat qaangerniarlugu Nuup kommuneata pilersitaa”Sullissivik Nuuk” pillugu nalunaarusiaq, Nuummi kommunalbestyrelsep ullumi ataatsimiinnermi oqaluuserisaanut ilaavoq.
- ”Sullissik Nuuk” pillugu nalunaarusiaq pitsaasumik suliaavoq, siunniussallu ukiup ataatsip ingerlanerinnaani tamarmik anguneqarsimanngikkaluartut inuit 15-it suliffittaarsimanerat alloriarnerujussuartut isigisariaqarpoq, Nuup borgemesteria Agnethe Davidsen, ”Sullissivik Nuuk” pillugu nalunaarusiaq, Nuup kommunalbestyrelseata ullumi ataatsimiinnerani oqaluuserineqarmat taama oqaaseqarpoq. Agnethe Davidsen isumaqarpoq, ”Sullissivik Nuuk ” siorna aallartimmalli suliffeqanngitsunit neqeroorfigineqartunit 145-init 15-it maannamut suliffeqalersimanerat kisimi isigisariaqanngitsoq, aammali suliffissaqartitsiniarnikkut suliap nutaap saniatigut sullissiviup ilaqutariinnut ajornartorsiutilinnut imigassamillu atornerluinermik ajornartorsiuteqartunut sullissinniarnera ilanngullugit nalilersorneqartariaqartut.
”Sullissivik Nuuk” pillugu nalunaarusiaq, Nuup kommunalbestyrelseani amerlanerussuteqartut, tassa Siumut Atassut, Inuit Ataqatigiit Kattusseqatigiillu ilaasortaatitaasa akuersaarpaat. Nalunaarusiarli Demokraatinit apeqquserneqarluni akuerineqanngilaq.
Kommuneqarfinnik Nakkutiliissoqarfimmi atorfillit aqqutigalugit, Demokraatit paasitinneqarsimanerarput, ”Sullissivik Nuuk” pillugu nalunaarusiaq kommuneqarfiit Nakkutilliisoqarfianit akuerineqanngitsoq, ilaatigut sullissiviup aqunnera eqqarsaatigalugu allannguuteqartoqarnissaa pissutigalugu. Tamanna pillugu Demokraatit apeqqusiipput Sullissivik Nuuk pillugu nalunaarusiaq Kommuneqarfiit Nakkutilliisoqarfianit ilumut akuerineqarsimanersoq. Tassungalu ilanngullugu sullissiup siunissaa Demokraatit aamma apeqquteqaatigaat. Apeqqutigineqartulli akissutissai silaannarmiikkallassapput pineqartup matoqqasumik ataatsimiinnermi oqaluuserineqarnissaa pissutigalugu.
Nuup kommuneata Kommuneqarfiit Nakkutilliisoqarfiata allattoqarfia suleqatigalugu Sullissivik Nuuk pillugu nalunaarusiaq misissoqqissaareerpaa, aaqqitassaasinnaasullu tunngavigalugit suleqatigiinnissamik isumaqatigiissutissamut siunnersuusiortoqassaaq.
