Sullissisoq: Inunnik isumaginninnermik suliaqartut sullissinerat aaqqinneqartariaqarpoq

 Tamanna aaqqinneqarsinnaavoq inunnik isumaginnittutut siunnersortit sulinerminni atugaasa pitsanngorsarneqarnerisigut, Nunatsinni Inunnik Isumaginninnermi Siunnersortitut Ilinniarsimasut peqatigiiffiat, NIISIP tusagassiutinut nalunaarumminni allapput, Meeqqat Oqaaseqartartuata, MIO-p misissuisitsinerminni inassutai qulequtaqartumi 'Inatsimmiit suliarineranut', atuareerlugulu.
 
Tamanna anguneqassappat meeqqanik inuusuttunillu sullissisut, sakkussanik pitsaanerusunik atugassaqartinneqartariaqarput, NIISIP siulittaasuata tullia, Sara Abelsen oqarpoq.
 
- Soorlu assersuutigalugu, meeqqanik inuusuttunillu ikiugassanik sullitaqalersilluta, suliassanik amerlassusilikkanik aalajangersaasoqartalersuuguni iluaqutaassagaluarpoq. Tassami massakkut imaappoq kommuni innuttaqarnerusuni inunnik isumaginninermik sullissisut ataasiakkaat amerlavallaanik sullissisinneqartarput, taamaalilluni meeqqamut inuusuttumullu sullissinerup qitiutinneqarnera qimanneqartarpoq, tassami sullissisup sullissinissaminut nukissat naammanneqa ajormata.
 
Tassalu tamanna allanngortinneqartariaqartoq, Sara Abelsen oqarpoq. Taanna Kommuneqarfik Sermersuup meeqqanut inuusuttunullu sullissivianni ullinnarni sulisuuvoq.
 
MIO-p mississuisitsinerani tikkuarneqartut ilagaat, isumaginninnermi siunnersortit kommunit ilaanni amerlavallaartunik suliassaqartartut ilaatigut suliassat artornartuullutik paasiuminaatsuusartullu eqqartorneqarlutik, tamalumalu kinguneranik sullissinissami siunertarineqartoq malillugu suliat ingerlanneqarsinnaasaratik taamaalillunilu amerlanertigut tamanna meeqanut atugarliortunut ajoqutaaginnalertarluni.
 
Tamanna pinngitsoortissagaanni isumaginninnermi sulisut sulliviisa akissarsiaasalu aaqqinneqarnissaasa saniatigut, sullissisut oqinnerusumik allatigut atugassaqartinneqassappata, kommunit Namminersorlutik Oqartussallu tigussaasunik ikiorsiissutissanik neqerooruteqartariaqarput.
 
- Taamaammat pissutsit aaqqinneqarunnanngillat taakku ikiorsiissutinik neqerooruteqanngippata, tassami taamatut sullissineq ullumikkutut ittoq ukiorpassuarni atugarput pitsaannginnami aamma akissaatit pitsaanngillat ullutinnullu naleqqukkunnaarsimallutik. Tamakku pitsaanerulersinneqassappata pingaaruteqarpoq susassaqartut suleqatigiillutik tamakkuninnga eqqartuinissaat.
 
Inunnik Isumaginninnermi Siunnersortitut Ilinniagaqartut peqatigiiffiani siulittaasup tullia, Sara Abelsen taama oqarpoq.