Sullissinermi ikiortitut ilinniarneq qujarunneqarpoq

Ilinniagaqanngitsut ilinniagallillu sulinermut inuttullu piginnaanngorsarnissaat, sullissinermilu ikiortitut naammassereeraanni niuernermi allaffissornermilu  ilinniakkamut, TNI-mut, qaffasinnerusumut ilinniagaqaqqilernissaannut kajumissaataanissaa siunertaavoq.

Campus Kujalleq, Qaqortumi Niuernermik ilinniarfiup GU-llu ataatsimut ilinniarfinngornerata kingorna atitaava, inuussutissarsiornermik ilinniartitaanermik nutaamik allaffissornermut pisiniarfilerinermullu tunngasumik periarfissiilerpoq. Sullissinermi Ikiortimik taaguuteqartumik.

Kalaallit Nunaanni Kommunit Kattuffiat, KANUKOKA, Niuernermik Ilinniarfiup siulersuisuini ilaasortaatitaqarpoq. Siulersuisunut ilaasortap  KANUKOKA-mi siunnersortaasup, ilinniartitaaneq nutaaq assut qujaruppaa.

-Tassami nunaqarfinni pisortani sulisut piginnaanngorsarneqarnissaannik kissaatigisartakkatsinnut tamanna naapertuulluinnarpoq. Sulisut taakku assigiinngitsorpassuarnik isumagisassaqartarput, sullissinermilu ikiortitut ilinniarnermikkut nalorninnginnerullutik sulisinnaanngussapput. Tamanna kommuninut iluaqutaassaaq, Erna Thomsen oqarpoq.

Kalaallisut, qallunaatut, tuluttullu oqaatsit, qarasaasialerineq, suliffimmi aningaasaqarneq, tuniniaaneq/sullissineq, inuiaqatigiilerineq, psykologii sullissinerlu, studieteknik, nammineq ilinniariaaseq, inuttullu ineriartorneq/attaveqarnerlu tunngaviusumik ilinnianeqassapput.

Niuernermik ilisimasaqarneq, aningaaserivimmi sullissineq, nunaqarfinni mittarfilerineq, ingerlatsineq, innuttaasunik sullissineq, kommunini naatsorsuuserineq kiisalu nunaqarfinni allakkerivilerinerlu ilinniarneqarsinnaapput.

Atuagarsoneq ilinniarnermullu atatillugu suliffimmi sungiusarneq paarlakaallugit ingerlanneqassapput. Ukioq siulleq sammivinnut marluusunut atuakkersornerit ataatsimut ingerlanneqassapput, marloriarluni sapaatit akunnerinik 8-nik sivisussuseqartunik.
Ukiup aappaani  marloriarluni atuariartortoqartassaaq, sapaatit akunnerini 9-ni sivisussuseqartunik, fagillu pisiniarfilerinermut allaffissornermulluunniit immikkoortinneqassallutik.

Ilinnialersussat siulliit aggustip 7-ani 2014 aallartissapput maajillu qeqqata missaanni najukkani Piareersarfik aqqutigalugu qinnuteqartoqarsinnaalissaaq.

Ilinniarneq ukiunik marlunnik sivisussuseqassaaq atuagarsorneq suliffimmilu sungiusarneq paarlakaallugit ingerlanneqassallutik.