Sullissineq kommunit tiguppassuk pitsaanerulissaaq
- Innarluutilinnik sullissinerup massakkornit pitsaanerusumik ingerlanneqalernissaa naatsorsuutigineqartariaqarpoq.
Tamanna qularutiginngilluinnarparput.
Ippassaq unnukkut radioaviisimi tusarparput innarluutilimmut ataataasup Sisimiuni najugallip Poul Erik Christensenip kommunit sullissinermik tigusinissaannut piareersimannginneraanera.
- Nilliajuanngikkaanni angusaqarneq ajornaqaaq, killuulluta uagut kommune oqaluttuutariaqartarsimavarput inatsisit qanoq isumaqarnersut, innarluutillillu qanoq pisinnaatitaaffeqarnersut. Naak tamanna killormoortussaagaluartoq, Poul Erik Christensen oqarpoq.
Pissutsit tamakku kommunit innarluutilinnik sullissilerpata atorunnaassapput, Enok Sandgreen neriorsuivoq.
- Tassa kommunit eqqumaffigilereernikuaat tamakkua, aamma sanaartorneq eqqarsaatigalugu, taava inatsisit atuuttut pikkorissaatigineqarneranni suli pitsaanerujussuarmik alloriartoqassaaq, taamaattumik ukiut siuliini pisimasut soorunalimi ajuusaarnartarput, kisianni massakkut ullut nutaat atuligassavut innarluutilinnut tunngatillugu pitsaanerulissasut naatsorsuutigaarput, tassa tamakkiisumik sullitilerutsigit, qitiusoqarfimmut aperisaqaqqaarata sullissisinnaanngorutta pitsanngoriaateqassammat.
