Sullerngit qaqutigoortut

Sullinernik angisoorsuarnik Nuup eqqaani takusaqartarsimasunik Pinngortitaleriffik juunimi saaffigineqartarpoq. Ilaat allakkatigut saaffiginnittarput, sullerngilli taamaattut toqungasut uumasulluunniit igalaaminernut ikillugit Pinngortitaleriffimmut aamma tunniukkiartorneqartarput, biologillu maanna misissuipput.
Allattoq Martine Lind Krebs, Carla Davidsen
juulip 13-at 2012 14:06

Sullinermik qernertumik angisuumik aappaluttunik niulimmik takisuumillu kapuutilimmik takunikuuit? Imaluunniit sullinermik tuttuusamik taaneqartartumik, tassa stankelbenimik, nissumi qulaatungaagut timimilu ilaani aamma aappaluttortalimmik?

Taava kisimiinngilatit.

Pinngortitaleriffik nittartakkamini erseqqissaavoq, taakku tassaasut sullerngit hvepsit, sullineqatiminnik inuussutillit, Kalaallit Nunaanni annersaat, latiinerisut Buathra laborator fabriciinik taaguutillit, Kalaallit Nunaannilu taamaallaat nassaassaasut.

Tuttuusarlu, Tanyptera nigricomi, Kalaallit Nunatsinni siornatigut takuneqarsimanngisaannarpoq. Sullerngit assigiinngitsut taakku marluk inunnut ulorianaateqanngillat.

Hvepsi sullineqatiminik inuussuteqartoq, pakkalussat puuliaasaanni manniliortartut, manniilu tuttuusat qullugiaasa kingorna nerisaraat.

Taamaattumik pakkalussat qullugiaasa qaqqani amerliartupiloornissaat tuttuusat pinngitsoortittarpaat, Pinngortitaleriffik nittartakkamini allappoq.

Sullerngit taakku kalaallisut qallunaatulluunniit taaguuteqartinneqanngillat, taamaaliornissamulli immaqa piffissanngorpoq?

 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq