Suliunnaarnermi ikiorsiissutit SIK-mut atassuteqanngillat

Ikerasammi Royal Greenlandip qaleralleriviani sulisut 20-it suliunnaarallarnerminni ikiorsiissutinik pisinnaasannginnertik pissutigalugu SIK-mi ilaasortaanertik apeqqusertaleraat, taavani sulisut sinniisaat David Larsen, ulloqeqqani radioaviimut oqarpoq. Tamannali SIK-mi ilaasortaanermut attuumassuteqanngitsoq, Ikerasammi kommunep allaffiani allattuusoq Sofie Kaspersen oqarpoq.

- Tassani ajornartorsiutaavoq, suliffeqarfimmi sulinnginnerup nalaani soraarsitaamaneq imaluunniit soraarsitaasimannginneq. Tassa sulinnginnerup nalaani suliunnaartutaavissimanngikkaanni ikiorsiissutit pisartagarilerneqarsinnaanngillat, taamaallaallu suliunnaavissimagaanni pisartagarilerneqarsinnaallutik, Sofie Kaspersen oqarpoq. Oqarporlu ikiorsiissutinik pisartagaqalernermut SIK-mi ilaasortaaneq imaluunniit ilaasortaannginneq apeqqutaanngitsut.

- Ikiorsiissutinik pisartagaqarnermut SIK attuumassuteqanngilaq, imaassinnaavorlu maani SIP-p tamanna maani paasinerlussimagaa. Sofie Kaspersen oqarpoq Ikerasammilu SIP kingullermik ataatsimiimmat tamatuminnga nassuiaassimagini oqaatigalugu.

SIK-p siulittaasuta Jess G. Berthelsen-ip suliunnaarnermi ikiorsiissutinik pisartagaqalernissaq SIK-mut ilaasortaanermut attuumassuteqanngitsoq radioaviisimut aamma erseqqissaatigaa.

Ikerasammi qalerallerivimmi sulisut sinniisaat David Larsen oqaaseqartinniaraluaratsigu iluatsinngitsoorparput.