Suliumajunnaartoqassappat Air Iceland piareersimavoq
Air Greenlandilli timmisartuutai sisamanngorpamiit nunamiiginnalissappata, tamanna Air Icelandimut qanoq iluanaarutaatigissanersoq killeqarpoq.
- Periarfissavut maannakkorpiaq killeqangaatsiarallarput. Aasarissuuvoq, inuit angallattorujussuullutik, timmisartuutivullu tamarmik angalaarput, Air Icelandimi pisortaaneq, Arni Gunnarson Sermitsiap nittartagaanit issuarneqarpoq.
Air Greenlandimili saqisut suliumajunnaassagaluarpata Air Icelandip sapaatip akunneranut suli amerlanernik timmisartuussilernissaa pisortaanerup ammaffigaa.
- Suliumajunnaarnissamik sioorasaarineq sivitsussagaluarpat, timmisartuussinernik amerlanernik piviusunngortitsisinnaanissarput anguniassavara, timmisartulli inuttallu eqqarsaatigalugit tamanna unamminartuussaaq, Arni Gunnarsson oqarpoq.
Air Iceland Kalaallit Nunaanni illoqarfinni tallimaniit sapaatip akunneri tamaasa aasaq manna ima angallassisarpoq: Nuummiit sapaatip akunneranut sisamariarluni timmisartuussisarpoq, Ilulissaniit, Narsarsuarmiit Konstabel Pyntimiillu sapaatip akunneranut marloriarluni, Kulusummiillu ullormut pingasorarluni timmisartuussisarluni.
