Suliumajunnaartoqarnera pissutigalugu timmisartorsuaq Københavnimeersoq kinguaattoorpoq
Kastrupimi suliumajunnaartoqarnera Air Greenlandip Københavnip Kangerlussuullu akornanni timmisartuussisarneranik aamma eqquissaaq.
Københavimit ullaakkut qulinut tanneq arfineq-pingasunut aallartoqartaraluarpoq, akunnerilli pingasut kinguaattooqqalluni. Timmisartorsuaq Danmarkimeersoq Kangerlussuarmut ualeru nalunaaqutaq tallimanut tanneq arfineq-pingasut missaanni tikissangatinneqarpoq, Danmarkillu tungaanut arfinermut aallassangatinneqarluni.
Atlantikoq qulaallugu timmisartuussinermi kinguaattoortoqarnera Kangerlussuarmit Nunatta sinneranut angallannermik aamma eqquissaaq. Tamanna pillugu sukumiinerusumik paasisaqarusukkaanni Air Greenlandip nittartagaatigut paasiniaasoqarsinnaavoq, teksttv-kkulluunniit aamma paasiniasoqarsinnaalluni.
Ukiuunerani sulinermi piffissat naammagittaalliuutigineqarput, tassami isumannaallisaaniarnermik suliallit akunnerni aqqaneq-marlunni sulinatik akunnerni arfineq-pingasuni sulisalernissaat siunniunneqarmat.
Taama sulisalertussaanermikkut ullut suliffissat qaammatip ataatsip ingerlanerani amerlinissaat sulisut aarleqqutigaat.
Isumaqatigiissummut akerliusumut/-mik suliumajunnaartoqarnera ingerlaannaq kinguneqarpoq, tassami ilaasussat utaqqisut amerlimmata. Nunanut allanut angalasussat nassataasa misissorneqartarfiini sulisut suliumajunnaaraluarput.
Timmisartuutileqatigiiffiit arlallit timmisartuutitik ikittuinnarnik ilaasoqartillugit aallartariaqartarsimapput, pilersaarutit malillugit aallarfissat eqquutsikkumallugit taamaaliortariaqarsimallutik.
