Suliumajunnaarnissamik sioorasaarut piviusunngortilerpaat
Kalaallit timmisartuutileqatigiiffiata timmisartunilu saqisut isumaqatigiinniarnerat Københavnimi isumaqatigiissitsiniartarfimmi nalunaaquttap akunnerini 17-ini isumaqatigiinniartoqareersorlu ajalusoorpoq. Isumaqatigiissitsiniartup nassuerutigaa, timmisartuutileqatigiinni pisortat saqisullu naapeqatigiiffissatut siunnersuut pillugu isumaqatigiissinnaanngitsut, taamaalillunilu sulinngiffeqarnerup nalerpiaani suliumajunnaarnissamik sioorasaarut siornatigut nalunaarutigineqareersoq piviusunngortussanngortoq.
Air Greenlandip qullersaqarfianit tusagassiorfinnut nalunaarutigineqarpoq, timmisartuutileqatigiiffik suliumajunnaarnissaq pinngitsoortinniarlugu ilungersuuteqarsimagaluartoq.
- Aningaasarsiatigut pitsanngoriaatissanik unillatsiartarnernullu pitsanngoriaatissanik malunnaatilinnik neqerooruteqaraluarpugut. Tamatumani ilaallutik sulinerup pilersaarusiorneranut sunniuteqaqataanissaq, sulinngiffiup sivitsorneqarnera ilinniaqqinnissamullu periarfissat pitsaanerusut. Aaqqiagiinnginnermi ilaasorisartakkatta akuliunneqarnerat ajuusaarutigiinnarsinnaavarput, tamatumali pinngitsoortinniarnissaa ajornakusooqaaq. Suliffeqarfiussagutta unammillersinnaassusillit taava annerusumik neqerooruteqarsinnaanngilagut, tuniniaanermut ussassaarinermullu pisortaq Christian Kjeldsen oqarpoq.
Air Greenland aamma timmisartuni saqisut peqatigiiffiat ACU isumaqatigiissutissamik angusaqaraluarput, isumaqatigiissulli tamanna qaammatip matuma aallartinnerani saqisunit amerlanerussuteqarluartunit itigartinneqarpoq. Ilaasortat taasitinneqarneranni 86 procentit itigartitsillutik taasipput.
- Isumaqatigiissutigisinnaanngisavut amerlaqaat. Ilaatigut sullissinerup pitsaasuunissaa qulakkeerniarlugu sulisut qanoq amerlatigisarnissaannut tunngavoq. Tamatuma peqatigisaanik soraarnerussutisiassanut tunngasut ajornartorsiutaapput, saqisut peqatigiiffianni siulittaasoq Anders Mark jensen oqarpoq.
Isumaqatigiinniartut qaqugu naapeqqinnissaat nalunarallarpoq, taamaattumillu pingasunngorpat unnukkumiit suliumajunnaartoqarnissaa avaqqunneqarsinnaajunnaarpoq.
