Suliumajunnaarneq takornarialerisunut annaasaqarfiussaaq
Takornariat 7.000-inik ikilisut kisitsisit kingulliit takutippaat.
Kalaallit Nunaanni Takornariaqarnermik Inuussutissarsiornermillu Siunnersuisoqatigiit pisortaata, Thomas Rosenkrandsip, oqarnera naapertorlugu takornariaqarnermik suliallit ukiumut isertittakkatik aasaanerani qaammatit marluk ingerlaneranni isertittarpaat, taamaammallu sapaatit akunnerinnaaniluunniit suliumajunnaartoqassappat malunnaatilimmik kinguneqarumaartoq.
Takornariaqarnermik suliallit kisimik pinnatik aammali takornariaqarnermik sulialinnut attuumassutillit soorlu umiarsuit ilaasartaatit, akunnittarfiit neriniartarfiillu aamma eqqugaajumaartut Thomas Rosenkrandsip erseqqissaatigaa.
Danskit angalatitseqatigiit aamma assigusumik nalunaaruteqarput, timmisartuussinermilu suliumajunnaartoqassappat millionilikkuutaanik annaasaqartoqarnissaa ernummatigineqarpoq. Aaqqiagiinnginnerup piffissaq kingulleq iluarsiivigineqarnissaa angalatitseqatigiit neriuutigaat.
Albatros Travel-imeersut angalanissamik allatut aaqqiissutissarsiorput. Angalatitseqatigiiffiup pilersaarutai naapertorlugit inuit 100-t ataasinngorpat Københavnimiit Kangerlussualiartinneqassapput.
- Kalaallit Nunaannulli tunngatillugu allatut aaqqiiniarneq ajornakusoorpoq, Michael Hjort Sermitsiap nittartagaani Sermitsiaq.gl-imi issuarneqarpoq. Angalaniartullu tusind-illit allat assigalugit illuatungeriit isumaqatigiissuteqarlutik suliumajunnaarnermik pinngitsoortitsinissaat neriuutigaa.
Suliumajunnaarnissaq pinngitsoortinniarlugu Air Greenlandimi saqisut peqatigiiffiat ACU kiisalu Air Greenlandip qullersai isumaqatigiinniarnitik aallarteqqippaat, illuatungeriit ullaaq manna nunatta nalunaaqqutaa malillugu arfinernut ataatsimeeqatigiinnitik aallartikkaat, ACU-p siulittaasuata Anders Mark Jensenip erseqqissaatigaa.
