Assi: Jason/Flickr Creative Commons

DMI: Suliumajunnaarneq Kalaallit Nunaanni timmisartuussineq eqqugaasinnaavoq

Danmarkimi nuna tamakkerlugu suliumajunnaartoqarpat silasiorfik Danmarks Meteorologisk Institut (DMI) susinnaajunnaassaaq, taamaasisoqarpallu naalagaaffeqatigiinni tamani mittarfeqarfinnut silasiornerit unissapput. Tamannalu timmisartuussinernut sunniuteqassaaq.

Danskit nalagaaffiata Danmarkimilu pisortani sulisut kattuffeqarfiisa arlaqartut, april 4-aat tikitinnagu isumaqatigiissummik naammassisaqanngikkunik, suliumajunnaarneq annertooq pilerpat kingornalu sulisitaqarumajunnaartoqassaappat Danmarkip ilarujussua eqqugaassaaq.

Taamaattoqassappallu Danmarks Meteorologisk Insititutimi sulineq aamma eqqugaassaaq, imaammat silasiortut, ingerniørit teknikerillu suliumajunnaassammata. Taamatut DMI-mi direktøri Marianne Thyrring KNR-imut oqaaseqarpoq.

- Kalaallit Nunaannut kiffartuussinitsinnut tunngatillugu, takorloorpara amerlasuutigut annikillineqassasoq.

Suliumajunnaarneq

Isumaqatigiissusiornerit unittoorneri pissutaallutik Danmarkimi kattuffiit, pisortani sulisut 10 procentii 15 procentillu akornani, suliumajunnaarniartut nalunaarutigaat, aprilip sisamaat 2018 aallarnerfigalugu.

Taakkulu inuit suliumajunnaartussat inuit 60.000-imiit 70.000-iussapput
Sulisitsisut, tassaasut naalagaaffik, nunap agguataarnera (regionit) kommunillu, illuatungiliipput nalunaaruteqarlutik pisortani atorfillit 440.000-it sulliffinniit mattussaassasut aprilip 10-aniit, isumaqatigiissusiornerit naammassisimanngippata.

Mattusinerup nalaani sulisut suliartoqqusaanngillat, akissarsiaqaratillu angerlarsimaannartariaqarlutik.

Paaissutissanik aallerfik: Forhandlingsfællesskabet, OK 2018, Moderniseingsstyrelsen

Mittarfeqarfinni silasiornerit unissapput

Silasiornerit nalinginnaasut saniatigut, mittarfinnut sakkutooqarfiunngitsunut silasiornermut nalunaarsuinerit immikkuullarissut – tassaasut TAF aamma METAR – aammattaaq suliarineqartassanngillat.

Naalagaaffeqatigiinnermi mittarfinnut sakkutooqarfiunngitsunut silassamik missingersunissamut, Danmarkimi Angallannermut aqutsisoqarfimmiit akuerisatuaat tassaapput DMI.

- Silasiornerit immikkuullarissut timmisartuussinermut atugassat, tassa timmisartut qangattareernerminni sumut missinnaanissartik nalunnginngittussaagamikku – Kalaallit Nunaannut tunngasut suliarisinnaanngilagut. Ilami Danmarkimut Savalimmiunullu tunngasut aamma suliarisinnaanngilagut (...).

- Tamanna ajornakusoortitsissaaq ingamillu Kalaallit Nunaanni timmisartuussinermut annertuumik sunniuteqassaaq, taamatut oqaaseqarpoq Marianne Thyrring.

DMI-p sikusiornermik kiffartuussinera, qanittukkut Københavnimiit Narsarsuarmut nuunneqartoq, marlunnartumik suliumajunnaarnerup nalaani annikillissaaq, sinerissallu imartaanut silasiornerit peerneqassapput, Marianne Thyrring nalunaarpoq.

Suliumajunnaatoqassappat Air Greenlandimi timmisartuussinermut qanoq maani sunniuteqassanersumut oqaaseqarumanngillat, Mittarfeqarfinullu innersuussissullutik. Mittarfeqarfinniilli aamma sunniutaasinnaasut pillugit oqaaseqarfigineqarusunngilaq.

AAMMA ATUARUK Danmarkimi mattussinissaq nunatsinnik eqquisinnaasoq

Taamaattorli Attaveqaqatigiinnermut Naalakkersuisoqarfimmi pisortaq Ruth Lindhardt aviisimut Sermitsiamut uppernarsarpaa, Danmarkimi annertuumik suliumajunnaatoqarpat Kalaallit Nunanni timmisartuussinermut sunniuteqassasoq.

Nalakkersuisoqarfiup Danmarkimi Klimaministeria DMI-lu attavigisimavaat pisutsit tamaasa misissorniarlugit.

Silaannakkut immakkullu ujaasisarnermut annaassiniartarnermullu isumaginnitut (SAR), ajornartoornermi upalungaarsimasunut ilaapput, taamaammallu suliumajunnaartoqassagaluarpat eqqugaassanatik, taamatut KNR-imut Issittumi sakkutooqarfik nalunaarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat