Suliumajunnaarneq Air Greenlandimut akisussaaq
Suliffeqarfissuaq taakkua saniatigut suliumajunnaartoqarnerani allanik aamma aningaasartuuteqassaaq.
- Tassami suliumajunnaarneq qangiuteriarpat, utaqqisut apuutsipallannissaat, taamaalillutalu naliginnaasunik angallassilleqqinnissaq anguniarlugu, timmisartunik attartortariaqalersinnavugut, Air Greenland-imi tuniniaanermut ussassaarinermullu pisortaq, Chrisitan Keldsen, tusagassiortunik ulumi katersortitsisuni oqarpoq.
Suliumajunnaartoqarneranit ilaasunut ullormut 2000-it missaanniittartunut ajornartorsiortitsinissaq Chrisitan Keldsenip arlaleriarluni ajuusaarutigaa. Kisianni isumaqarpoq, saqisut peqatigiiffiata piumasaqaataanut Air Greenland sapinngisamik tusaaniarsimasoq.
Oqarpoq, piumasaqaatit pingajorarterutai marluk akuerisimagitik. Timmisartumi sulinerup aaqqissuuneqarnerani sulisut sunniuteqarsinnnaanerat, sulinerup sivikillineqarsinnaanera, sulinngiffeqarnerup sivitsorsinaanera aamma ilinniaqqinnissamut periarfissat pitsaanerit assersuutigiinnarlugit suliffeqarfiup neqeroorutigisimavai. Aamma akissarsiat sulinermilu atukkanut tunngasut ukiut pingasut ingerlaneranni 12 procentimik pitsanngoriaateqarnisssaat neqeroorutigisimavaat.
Saqisut sulinerminni uniffeqartarnissaat siusinnerusukkut eqqaaneqartut qiviaraanni, nalunaaquttap akunneri sisamat sinnerlugit timminerni minutsini 15-ini unitsiartarnissaq aammalu minnganermi minutsini 29-ni nerinissamut unitsiartarnissaq Air Greenland-ip neqeroorutigisimavai. Kisianni taakkua saqisunit akuerineqarsimanngillat. Sulisut sulinerup aaqqissuunneranut sunniuteqaqataarusupput, tassalu isumaqatigiissutit naapertorlugit saqisut amerlassusissaminnit ikinnerugaangata, sullissinerup pitsaassusissaa qanoq ittuussanersoq sunniuteqarfigerusuppaat.
Kisianni Air Greenland tamatumunnga naaggaarpoq.
Christian Keldsenilu aperaarput, sooq aaqqiagiinnginneq suliffeqarfimmut akisooq, angalasussarpassuarnillu eqquisussaq orniginartinnerusimagaat, sulisut sulinermi pitsaasumik atugaqarnissamik piumasaqarnertut taasaat akuersaarnagu?
- Oqartoqarsinnaavormi, aningaasarpassuit pineqartut. Aamma tunngavilersuut paasilluarsinnaavara.
Kisianni taava isumaqatigiinniarnerni uagut sanngiinnerujuannalersinnaavugut. Taassuma saniatigut uagut piginneqatigiiffittut siunissaq ungasinnerusoq eqqarsaatigalugu Kalaallit Nunaannut ukioq kaajallalugu angallassinerup qularnaarnissa soqutigisaraarput. Suliffeqarfiullu akisussaassuseqartumik ingerlannissaanut uatsinnut periarfissinngikkutta, taava tunngaviusumik isummatsinnik iperangaqassaagut. Taamaalippallu aningaasat 1,5 millioner koruuniniit 2 milloner koruunitut angitigisut pinngagit amerlanipilussuit annaassavagut, Christian Keldsen oqarpoq.
