Sulisut uninngasunit saassunneqakulapput

Dronning Ingridip napparsimmavissuani tarnimikkut nappaateqartut immikkoortortaqarfianni A1-imi sulisut peqqissaasullu uninngasunit saassunneqartarnerat akulikillillunilu sakkortutisigaluttuinnarpoq. Sulisut imaannaanngitsunik atugassaqartitaapput, qaangiuttoortarnerillu ingasalluinnarput.
decembarip 19-at 2007 17:14

Suliffeqarfimmi ajornartorsiutit imaannaanngitsut pillugit A1-imi peqqissaasutut sulisut, kattuffimminnut Peqqissaasut Kattuffiannut saaffiginnipput napparsimavissuarmi aqutsisunik aaqqiissuutissamik iliuuseqartoqarnissaq anguniarlugu. Aqutsisulli tusaajumanngillat, Peqqissaasut Kattuffianni siulittaasoq Birtha Bianco oqarpoq.

Tarnimikkut nappaateqartut immikkoortortaqarfianni A1-imi peqqissaasutut sulisut sullivimminni atukkatik imaannaangitsut pillugit saaffiginnipput. Sulisut ilaat akunnerit 16-it sulisariaqartarput taassumalu malitsigisaanik immikkoortortaqarfimmi sulisut uninngasunit saassunneqartarnerat akulikilligaluttuinnarluni, Birtha Bianco oqarpoq.

Sulisunut saassussinerit arfineq marluk siorna nalunaarutigineqarput, piffissamilu kingullermi sulisunik saassussinerit 20-t tikillugit amerlassuseqarput, ingammik ukiariartornerani, tamannalu tusaanngitsuusaginnarsinnaangilarput, Birtha Bianco oqarpoq. Tarnimikkut nappaateqartut immikkoortortaqarfianni peqqissaasutut sulisut kattuffimmut saaffiginnipput Dronning Ingridip napparsimmavissuani aqutsisunit tusaaniarneqanngitsutut misigisimagamik, sullivimminnilu tarnimikkut timikkullu atukkatik ajorluinnartut pillugit ikiorneqarusukkamik. Massakkorluinnaq qanoq iliuuseqartoqartariaqartoq peqqissaasut kattuffimminnut saaffiginninerminni piumasaraat. Peqqissaasut kattuffiat A1-imi peqqissaasut peqatigalugit Dronning Ingridip napparsimmavissuani aqutsisut oqaloqatigisimavaat tarnimikkut nappaateqartut immikkoortortaqarfiani pissutsinik aaqqiinissamut iliuuseqarnissaq pillugu, taakkuuppummi immikkoortortaqarfimmi atukkanik aaqqiissuuteqartussat.

A 1-imit sulisut atugaat pillugit Peqqissaasut Kattuffiat Peqqinnissamut Naalakersuisumut Arkalo Abelsen-imut kiisalu inatsisartut peqqinissaq pillugu ataatsimiititaliaanni ilaasortamut Asii Chemnitz Narupimut allagaqarpoq.

Peqqissaasut Kattuffiata naatsorsuutigaa Dronning Ingridip Napparsimmavissuani aqutsisut sapaatip akunnerata uuma ingerlanerani saaffiginnissut akissuteqarfigiumaaraa.