Sulisut nunani allaneersut pillugit inatsisissaq piariingajalerpoq

Sulisut nunani allaneersut pillugit inatsisissatut siunnersuut, suliniutinut angisuunut inatsimmut aqqutissiuussisussaq, Folketingip Kalaallit Nunaannut tunngasunut ataatsimiititaliaata isumaliutissiissusiaa saqqummiunneqangajalerpoq.
Allattoq Mads Lynge
maajip 27-at 2014 07:34

Naallu isumaliutissiissutaannaagaluartoq, partiit marluk akimmisaartitsipput. Partii Enhedslisten allannguutissatut siunnersuummik saqqummiussivoq, Dansk Folkepartilu akerliulluni, siunnersuut itigartippaa.

- Isumaqarpugut, Naalagaaffiup Kalaallit Nunaanni aatsitassarsiornissamut sunniuteqarsinnaanissani qatangiinnartissimagaa. Naalagaaffiup sunniuteqarsinnaanissani eqqumaffigisimasuuguniuk, aatsitassarsiorneq pillugu Naalagaaffeqatigiinnerup iluani suleqatigiilluarnerusoqarsimasinnaagaluarpoq, assersuutigalugu suliniutinut angisuunut inatsisip tuaviuutipilunnera pinngitsoortinneqarsimasinnaagaluarluni. Aatsitassarsiorneq pissusissamisoornerusoq, sulisullu nunani avannarlerneersut sulisorineqarsimasinnaagaluarlutik, sulisullu atugaat pitsaanerusut qulakkeerneqarsimasinnaagaluarlutik, Kalaallit Nunaannut tunngasunut ataatsimiititaliami ikinnerussuteqartut, ilaasortat sisamat Dansk Folkepartimeersut, isumaliutissiissummi oqaaseqaataanni ilaatigut allassimavoq.

Dansk Parti isumaqarpoq suliniutinut angisuunut inatsit taama isikkoqarluni avataaniit suliartortunik akilernerluilluni sulisitsinermik ammaassisoq, Kinamiullu Issittumi sunniuteqarsinnaassuseqarnerulissasut, soorlu aamma suliniutinut angisuunut inatsit Kalaallit Nunaata aningaasarsiorneranut pitsaanerulersitsissanersoq patajaannerulersitsissanersorlu apeqquseraat.

Enhedslisten isumaqarpoq Naalagaaffiit Peqatigiit sulisoqarneq pillugu suliniaqatigiiffiannit ILO-mit oqaaseqaateqartoqarsimasariaqaraluartoq, ILO-mi aalajangersakkat unioqqutinneqarsimannginnerat taamaasilluni qulakkeerneqarsimaniassammat. Aatsaat tamanna qulakkeerneqarsimappat inatsisip akuerineqartariaqaraluartoq Enhedslisten isumaqarpoq.

Sulisunut nunani allaneersut pillugit inatsisissatut siunnersuut Folketingimi maajip ulluisa 20-anni siullermeerneqarpoq, Kalaallit Nunaanullu tunngasunut ataatsimiititaliami marloriarluni oqaluuserineqarnikuulluni.

Apeqqutit 96-it Inatsisinik Atuutsitsinermut Ministereqarfimmut apuunneqarsimapput, tamangajammillu akissuteqarfigineqarnikuullutik.

Inatsissatut siunnersuut juunip ulluisa sisamaanni aappassaaneerneqassaaq.

Inatsisissatut siunnersuut pillugu paasissutissat sukumiinerusut Folketingip nittartagaani www.ft.dk -mi alakkarterneqarsinnaapput.