Sulisut ilinniarsimanngitsut illernissaat tuaviuuttariaqarsoraa

Suliffeqarfiit tunineqaraangata sulisut inatsisitigut illersugaasalernissaat anguniarlugu Johan Lund Olsen inatsisartuni ullumi siunnersuuteqarpoq.

- Namminersornerullutik Oqartussaniit suliffeqarfiit namminersortunngorsartinneqartarput, soorluttaaq Arctic Umiaq Line eqqaaginnarneqarsinnaavoq. Suliffeqarfiit suliffeqarfinnut allanut tunineqarsinnaasarput aammalu kattunneqarsinnaasarlutik. Taama pisoqartillugu atorfillit kisimik illersorneqarsinnaasarput sulisartullu sunnguamilluunniit illersorneqarsinnaasaratik, Johan Lund Olsen oqarpoq.

Johan Lund Olsen inatsisartut oqaluttarfianni oqalunnermini kissaatiginartippaa siunnersuutigisami ukiaq manna inatsisartut ataatsimiinnerini naammassineqarnissaa. Aperaarpullu sooq taama nukingiutsigineraa.

- Ukiakkut upernaakkut immikkulluunniit ataatsimiittoqartillugu namminersortunngorsaaneq oqaluuseriuaannarparput, tamannalu allanngortussaagunanngilaq, oqarpoq. Qalleqqissaavorlu ukiuni makkunani kommunit kattunnissaat sulissutigineqaleruttortoq aamma eqqaamaneqartariaqartoq.

- Allaat januaarip aallaqqaataaniit akileraaruserisarneq eqqarsaatigalugu allanngortiterisoqalereertussaalluni. Atorfillit isumannanngillat, kisianni sulisartut aamma pisortani sulisuusut pitsaanngitsumik eqqorneqarsinnaapput. Tamakkuuku pinaveersimatinneqaqqullugit taamatumik una suliassaq nukingiuteqqugiga, Johan Lund Olsen oqarpoq.

Taassuma neriuutigiuarsinnarpaa ukiakkut ataatsimiinnerup ingerlanerani tamatuma naammassineqarnissaa.

- Taava tassa naalakkersuisut erseqqilluinnartumik peqquneqassagaluarput upernaamut ataatsimiinnissatsinnut inatsit akuerisassanngorlugu. Tassami naalakkersuisut inatsisissamik siunnersuusiortussaagamik, taama oqarpoq Inuit ataqatigiit tunuliaqutaralugu Inatsisartuni ilaasortaq Johan Lund Olsen.