- Soorunami angerlartitaariataarluni toqqissisimananngilaq. Sulisut toqqissisimanngillat. Tamannalu paasinarpoq. Qanoq ilillutimmi akiligassatik akilissagamikkit? Qanoq inuuniassappat? Tamakkorpassuit ilaa? ernumanarsinnaagami sulisuulluni. Soorunami neriuppunga una ikiorsiissut sulisunut iluaqutaassasoq, aamma suliffeqarfinnut allanullu, Maren Louise P. Kristensen oqarpoq.Assi: KNR

Sulisut ikiorsiissutinik annaanneqartut

Nuummiittut Inuk Hostels aamma Pascucci namminersorlutik oqartussat ikiorsiissutinik pilersitsinerat nuannaartutigaat. Taamaakkaluartorli suli ernumassuteqarput.

- Soorunami eqqissiallannartorujussuuvoq, taamatut ikiorserneqarluni naalakkersuisuninngaaniit. Toqqissiallannarpoq assut, kisianni aamma taamaaliorneq pissusissamisuuginnarpoq, Inuk Hostelsip pisortaa, Maren Louise P. Kristensen taama oqarpoq.

Ullut makku piginnittunut sulisunullu ernumanarsimapput, maannami naluaat qaqugu ammaqqissanerlutik, qanorlu annertutigisunik annaasaqassanerlutik.

AAMMA ATUARUK Coronap ajornartorsiortitsinera: Inuussutissarsiutit milliardip affaanik ikiorserpaat

Inuussutissarsiornermut ikiorsiissutit
Ikiorsiissutit nunatsinni suliffeqarfiit coronavirusimik ajornartoornermi aniguinissaannut iluaqutaassapput. Aningaasat taakkua soraarsitsinissaraluanik pinngitsoortitsissutaaassallutillu aningaasarsiatigut annaasanut taartisiassanut atorneqassapput.

50 millionit koruunit namminersorlutik inuussutissarsiortunut aammalu kiffartuussinermik, neriniartarfiuteqarnermik takornariaqarnermillu inuussutissarsiutilinnut ikiorsiissutiginasuaatigineqassapput.

100 millionit koruunit ilaatigut aalisarnermik, angallassinermik sanaartornermillu inuussutissarsiutilinnut atorneqassapput.

107 millionit koruunit sulisut angerlartitat soraarsitaaqqunagit taakkua aningaasarsiassaannut atorneqassapput.

Suliffeqarfiit akileraarutinut akitsuutinullu akiliinissaannik kinguartitsineq. Tamanna nunatta karsianut qaammammut 250 millionit koruuninik akeqartassaaq.Nuummi coronavirusip tuniluutipiloornissaa pinaveersaarniarlugu ataatsimoorfiusinnaasut oqartussanit matuneqarput, tamannali millionilikkaat nalingannut inuussutissarsiortunut annaasaqaataavoq.

Taamaammat Naalakkersuisut inuussutissarsiortunut ikiorsiissusiornissartik maanna sulissutigaat, nunatta karsianut milliardit affaannik maannamut naleqartussatut tagginneqartumik.

Naalakkersuisut arfininngornermi taama tusagassiortunut katersortitsinerminni nalunaaruteqarput.

Aningaasarsiatigut annaasanut 107 millioner koruunit immikkoortinneqarput.

Maren Louise P. Kristensen maanna ikiorsiissutinut qinnuteqaasiuleruttorluni oqarpoq, taassumalu sulisut toqqississisimalernissaat neriuutigaa.

- Soorunami angerlartitaariataarluni toqqissisimananngilaq. Sulisut toqqissisimanngillat. Tamannalu paasinarpoq. Qanoq ilillutimmi akiligassatik akilissagamikkit? Qanoq inuuniassappat? Tamakkorpassuit ilaa? ernumanarsinnaagami sulisuulluni. Soorunami neriuppunga una ikiorsiissut sulisunut iluaqutaassasoq, aamma suliffeqarfinnut allanullu.

Angorusutat ikiorsiissoqarneratigut naammassineqassapput

Nuummi neriniartarfinnik Esmeraldamik aamma Pascuccimik piginniittoq, Krissie Berthelsen Winberg, ikiorsiissuteqarnissamik neqeroorut nuannaarutigaa.

Privatfoto: Krissie Berthelsen Winberg

- Inuiaqatigiinniikkama uagut suliffiutitsitut ittunut taamannak asannik isaassisinnaasumik oqiliallallungalu nuannaaqaanga. Uagummi Allatulli ajutoorsinnaavugut.

Esmeralda Pascuccilu ulluni makkunani matoqqavoq, taamaalillutik isertitaqanngivissorput. Krissie taakkunani katillugu 41-nik sulisoqarpoq, ikiorsiissutillu pilersinneqarneratigut sulisuni tamakkerlugit sulisoriinnarsinnaagamigit nuannaaqaaq.

- Sulisutta sulisoriinnarnissaannut aningasartuutittalu akilernissaannut

pisinnaatillugit taamannak ikiorserneqarsinaatilluta, akunnattoorneq manna anigorsinnaarpasipparput. Tassa ikiorsiissutit siunertaat uagutsinnnut naammassineqarpoq.

Siunissaq suli nalorninarpoq

Sulisitsisut Peqatigiiffianni Akunnittarfiutillit, neriniartarfiutillit takornarialerisullu immikkoortuanni siulittaasup, Akunnittarfimillu Hotel Hans Egedemik piginneqataasup, Helge Tangip ikiorsiissusiornissaq nersorpaa.

- Ikiorsiissummik pilersitsiniarneq inuussutissarsiortunut, immikkullu uagut inuussutissarsiutitsinut, maanna akunnattooqqasunut, kusanaqaaq.

AAMMA ATUARUK Partiit minnerit pingasut: Ikiorsiissutit amerlanernit suleqatigiissutigineqartariaqaraluarput

Ikiorsiissutit akunittarfinnut takornarialerisunullu neqeroorutigineqarnissaat naatsorsuutaagaluartoq, siulittaasup siunissaq suli ernumanartoqartippaa:

- Siunissap qanoq isikkoqarumaarnersoq suli nalunarpoq, naluarpummi nualluut qaqugu unikkumaarnersoq. Kisianni neriuutigaarput qaammatit arlaqanngitsut qaangiuppata qaangiussimassasoq.

Isummersuutit