Sulisut ataatsimiimmata Sarfaq Ittuk kinguaattoorpoq

juulip 19-at 2005 10:50

Sarfaq Ittuk Nuummit nalunaaqutaq aqqanermut kujammukarluni aallartussaagaluarluni sinersortaammi sulisut suliaminnik unitsitsigallarnerat pissutigalugu kinguaattoorpoq.

Kujammukartussaq, Søren Lyberth oqarpoq, umiarsuaq kinguuaattoormalli ilaasussat utaqqikatassimaqisut.

-Sussaanngilaq, apuukkattali 1 ½ time sinnerlugu maani uninngavugut, massakkullu aamma kinguartooqqippoq, Søren Lyberth oqarpoq.

Ataatsimiinneq naammassimmat ilaasussat ikitinneqarput, ilaasussarpassuilli utaqqisut, Søren Lyberth-ip ilanngullugu oqaatigaa.

-Ajorpoq taamatut utaqqisinneqarluni. Kalerrinneqassanatalu. Eqqoriaaqattaarpugut. Sumi tamaani apersuilluta paasisaqalaartarpugut, Søren Lyberth oqarpoq.

Sulisut sulinerminni unitsitsigallarnerat pissutigalugu ilaasussarpassuit talittarfimmi utaqqerrapput nalunaaqutaq aaqqaneq qaangerlugu tanneq pingasunngoriitsiartoq sulisut sulileqqimmata ilaasussat aallarsinnaanngorput.

-Inuit nuannarinngilaat taamatut iliortoqarmat, nuannarinngilluinnarpaat kinguaattoortoqarmat, ingammik kalerrinneqartannginnertik nuannarinngilaat, oqarfigineqartannginnertillu qaqugu susoqassanersoq, Søren Lyberth naggasiivoq.

Sarfaq Ittuk nalunaaqutaq ataatsimut Nuummit kujammukarluni aallassaaq. Ilaasut 180-iupput.

Jess G. Berthelsen oqarpoq, Arctic Umiaq Linemi sulisut siunissartik nalornissutigigamikku ataatsimiittut. Umiarsuaatileqatigiiffik tunineqartussanngorpoq sulisullu aappaagumiit suliffissaarussinnaallutik.

SIK-p siuliuttaasua aamma isumaqarpoq, Naalakkersuisut siulittaasuat Hans Enoksen umiarsuaatileqatigiiffiup siunissaa pillugu paasiuminaatsumik isummersimasoq. Soorlu suut tamaasa akigalugit umiarsuaatileqatigiiffimmik tuniniaanissaq anguniarneqartutut isikkoqartoq.

- Siullermik piginneqatigiiffik akilersinnaasunngortinniarneqarpoq tamatumalu kingorna tuniniarneqarluni. Sooq akilersinnaasoq tuniniarneqassava?, SIK-p siulittaasua Jess G. Berthelsen taama aperaaq.