Sulisut akissarsiaat 15 procentinik qaffanniarpaat

Igitsinimi sapaatip-akunneri pingajussaat akerliusoqarpoq. Naalakkersuisullu akerlerineqaqisut Igitsinimi pisortani sulisut akissarsiaasa 15 procentinik qaffannissaannik ullumi neriussuuteqarput. Mubarakip naalakkersuisortaavisa ullumi ataatsimeeqqaarneranni neriorsuut saqqummiunneqarpoq.
Allattoq Mads Lynge
februaarip 07-at 2011 17:30

Neriorsuut neriorsuutigineqartuni, præsident Hosni Mubarakimut akerliunernik annikillisitsiniartussani, kingulliuvoq. Neriorsuisoqartaraluartorlu Kairomi illoqarfiup qeqqani akerliussutsimik takutitsinerit unitsinneqanngillat.

Præsident Mubarakip ullumi naalakkersuisuni nutaani ministerit ataatsimeeqatigeqqaarpai, ataatsimiinnerullu atorneqarsinnaasumik inerneqarnissaa ilimagineqareersimavoq.

Inernerineqarporlu pisortani sulisut akissarsiaasa qaffannissaat, tamannali innuttaasunit naammagineqarnavianngilaq. Igitsinimimi akissarsiat appasereeqigamik.

Taamallu neriorsuinera eqqissisoqarneranik kinguneqarnavianngilaq.

Kairomilu illoqarfiup qeqqani akerliussutsimik takutitsisut tamanna naammaginngilaat. Præsident Mubarakimi aatsaat tunuarpat akerliujunnaarniarput.

Akissarsiat qaffannissaannik neriorsuineq pisortani atorfillit akerliussutsimik takutitsisunik tapersersuinerannik unitsitsiniaaneruvoq.

Akissarsiat qaffannissaannik neriorsuineq akerliunermut sunniuteqarnavianngitsoq ilimanarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq