SIK-p siulittaasuata maanna ernummatigilerpaa SIK-mi ilaasortat 500-nik amerlanerusut Royal Greenlandip KNAPK-llu raajat akii pillugit
aaqqiagiinngissuteqarnerannit eqqugaanissaat.
Taakkumi isumaqatigiissinnaannginnerat, aalisartut raajanik Royal Greenlandimut tuniseqqusiunnaarnerannik kinguneqarpoq.
Soorluttaaq Ilulissani Royal Greenlandip tunisassiorfiani sulisut inuit 110-t maanna sulinngitsut.
- Allatut iliorsinnaanngilanga taamaallaat illuatungeriit kajumissaaginnarsinnaavakka aaqqiissutissamik nassaaqqullugit, SIK-p siulittaasua Jess G. Berthelsen aaqqiagiinnginneq pillugu taama oqarpoq.
Taamatuttaaq qerititsiviit raajaaruppata tunisassiorfinni sulisut suli amerlanerusut angerlakaatinneqartussanngussasut erseqqissaatigineqarpoq.
Tamannalu sapaatip-akunnerata naanerani pissangatinneqarpoq.
Jess G. Berthelsen aamma erseqqissaavoq, aaqqiagiinnginnermut tunngatillugu akuliussinnaanatik.
Ilaasortatillu aaqqiagiinnginnermit eqqugaasut kajumissaarpai kommuniminni ikiorsiissutinik qinnuteqaqqullugit.