Sulisussaaleqisarneq iliuuseqarfigerusuppaat

Sulisussanik pisariaqartinneqartunik pissarsiornermi nuunnissamut tapiissutinik aamma taartaagallartartunik pissarsiortarfinnik pilersitsinissaq Nuup Kommuniata sulisoqarnermut ataatsimiititaliaata siunnersuutigaa.
Allattoq Elisa Isaksen
juulip 01-at 2008 06:16

Doris Jakobsen ataatsimiititaliami siulittaasuusoq oqarpoq, sulisussanik pisariaqartinneqartunik amigaateqarneq anigorneqassappat, sulisoqarnermut tunngasut eqaannerusariaqartut.

Nuunnissamut tapiissutit atorlugit sivikinnerusumik atorfinitsitsigallarsinnaaneq suliffeqarnermut ataatsimiititaliap siunnersuutigaa, tamaaliornikkut sulisussanik illoqarfinnit allanit tikisitsisoqarsinnaanissaa anguneqassammat.

- Taamaaliornitsigut illoqarfimmi sulisussanik amigaateqartoqartillugu illoqarfinnut allanut sulisussarsiortoqarsinnaassaaq, Doris Jakobsen oqarpoq.

- Aamma Kalaallit Nunaata avataaniit sulisussarsiorsinnaaneq ullumikornit eqaannerusariaqarpoq, tassami najugaqarnissamut sulisinnaanermullu akuersissutinik qinnuteqartarneq Danmarkimi Nunanit allanit nunasiniartunut allaffeqarfik piffissartornarlunilu kinguarsaataasarmat.

Tamannalu ukiut tamaasa ajornartorsiutigineqartarmat, ataavartumik aaqqiissuutissamik misissuinissaq pisariaqartinneqartoq, Nuup Kommuniani sulisoqarnermut ataatsimiititaliap siulittaasua Doris Jakobsen oqarpoq.

Nuuk Kommuniata sulisoqarnermut ataatsimiititaliaata ajornartorsiut pillugu ukiap ingerlanerani attuumassuteqartunik ataatsimeeqatiginnittarniarpoq.