Sulisussaaleqineq politikkeqannginnermut peqqutaatinneqarpoq
Kommunit 2001-imi isumaqatigiipput, meeqqanut inuusuttunullu politikkiliorniarlutik. Maannamulli sisamaannaat politikkiliorsimammata sumiginnaanertut allaat nalilerneqarsinnaasoq, kommunit politikkiinik misissuisimasoq Radioavisimut ulloqeqqanut oqarpoq.
Kommunelli amerlaqisut politikkiliorsimannginnerannut sulisussaaleqineq peqqutaaqataasoq, KANUKOKA-mi siulittaasutut juulip aallaqqaataani ivertinneqartussaq Siumumeersoq Lars Karl Jensen erseqqissaavoq.
- Maluginiarpara isumaginnittoqarfinni suliassarpassuummata inuttassaaleqisoqarmallu politikkiliornissamut kinguaattoorsimasut. KANUKOKA-p siulittaasussaa Lars Karl Jensen taama oqarpoq.
Kommunit meeqqanut inuusuttunullu politikkeqarnerannik Meeqqat Inuusuttullu Pillugit Ilisimasaqarfik misissuititseqqammerpoq. Misissuinerup takutippaa, kommunit maannamut sisamaannaat, tassaasut Ilulissat, Qasigiannguit, Aasiaat aamma Nuuk meeqqanut inuusuttunullu politikkiliorsimasut.
- Tamanna eqqumiiginalaanngitsuunngilaq sumiginnaanertullu taaneqarsinnaalluni, pingaartumik meeqqat inuusuttullu atugarisaat kingullertigut oqallisigineqangaatsiarnerat eqqarsaatigalugu. Misissuisuusimasoq Inerisaavimmilu atorfilik professor Peter Dahler Larsen naliliivoq.
Tamanna pillugu Lars Karl Jensen ima akissuteqarpoq:
- Isumaqatigisinnaavara, kisianni kommunit ilaasa sulisussaaleqinertik pissutigalugu suliassanik pilertornerusumik naammassinnissinnaaneq ajorput, aamma suliat nutaat ilusilersorniarneri oqitsuinnaaneq ajormata paasisinnaavakka kinguaattooqqammata. Tamannali utoqqatsissutiginagu suliassap naammassineqarnissaa kaammattuutaajumaarpoq. Lars Karl Jensen erseqqissaavoq.
Kommunit politikkillit ilaatigut, meeqqat inuusuttullu pisinnaatitaaffiinut imaluunnit sumiginnakkat ikiorneqarnissaannut tunngasunik anguniagassaminnik politikkiliorsimapput.
Politikki pillugu nalunaarusiortoq naliliivoq, politikki anguniakkanik ersersitsisarmat minnerunngitsumillu meeqqat pitsaasumik peroriartorfissaqalernissaat qulakkeerneqassammat kommunit politikkiliornissaat pingaaruteqarluinnartoq.
- Juulip aallaqqaataani sulileriaruma KANUKOKA-mi tamakkuninnga suliaqartunik sinerissamullu qanoq attaveqarnerit sumullu killiffii paaseriarlugit suleriaqqinnissamut aallaavissarput piaartumik siunnersuusiortariaqassavarput. Lars Karl Jensen oqarpoq.
Lars Karl Jensen aamma oqarpoq, kommunit meeqqanut inuusuttuaqqanullu politikkilioreersimasut suliarisimasaat kommuninit allanit isumassarsiorfigineqarsinnaalluartut, tamannalu kommunit kinguleruttut atorluarsinnaagaluaraat.
