Sulisunik kalerrisaarneq unitsippaat
Naalagaaffiup timmisartui avatangiisinik nakkutilliisut uuliamik qillerivinnukartussanngoraangata Mærsk Olie og Gasip 1999-imiilli sulisuni kalerrittarsimavai. Mærskip nalunaarusiaani nutaami tamanna atuarneqarsinnaavoq, ilaatigut taamatut kalerriisoqartillugu inatsisinik unioqqutitsisumik maangaannaq uuliakoortoqarnerata unitsikkallarneqartarneranik oqaluttoqarnera, nalunaarusiami tassani suliffeqarfiup eqqunngitsuunerarpaa.
- Salloqittaasoqartarneranut peqquserluttoqartarneranullu ersiutaasinnaasunik nassaartoqanngilaq, Mærsk Olie og Natur Gas-imi pisortaq Jakob Thomassen aviisimut Politikenimut oqarpoq.
- Sulisunik kalerriisarneq inatsisinik unioqqutitsinerunngilaq. Tamanna uagut iluarinartipparput, kisianni Avatangiisinut Aqutsisoqarfiup tamanna taamatut isiginngimmagu unitsipparput, pisortaq oqarpoq.
Taamaalilluni Mærsk Olie og Gas-ip sulisuminut kalerriuteqartarnini decembarip aqqaneq-aappaanili unitsereerpaa.
Aviisip Politikenip paasissutissiissutigaa, kalerriisoqaraangat ajoqutit iluarsiniarneqapallattartut imaluunniit uuliaarluerneq pillugu eqqunngitsumik nalunaarusiortoqapallattartoq.
Nalunaarusiaq Avatangiisinik Aqutsisoqarfimmit suli oqaaseqarfigineqanngikkaluartoq, Avatangiisinut ministerip Karen Ellemannip (V) neriuutigaa, suliffeqarfiup sulisuminut kalerriisarnini mianersuutiginerulissagaa.
- Matumani pingaarneruvoq Mærskimit nalunaarutigineqartartut uppernartuunissaat, Karen Ellemann oqarpoq, nalunaarusiarlu Avatangiisinut Aqutsisoqarfimmit misissoqqissaarneqartinnagu annerusumik oqaaseqarfigerusunnagu.
Mærsk Olie og Gas Avatangiisinut Aqutsisoqarfimmut januaarimi ataatsimiigiaqquneqassaaq aamma avatangiisinut ministeri folketingimi januaarip 13-ianni isumasioqatigineqassalluni.
