Sulisunik isumaginninneq aaqqissugaanerusunngortinniarpaat

Corporate Social Responsibility - CSR-imik naalisarneqartartoq tassaavoq suliffeqarfinni isumaginninnikkut akisussaaqatigiinneq. CSR nunat tamalaat attaveqaatigaat, inuussutissarsiutinik ingerlataqartut inuiaqatigiinni akisussaassuseqarnerannut tunngasuusoq.

Kalaallit Nunaanni suliffeqarfiit arlallit CSR Greenland-imik taallugu suliniummut ilanngupput.

Suliniut ualeru tamanut tusarliunneqassaaq, ilaatigut peqataasoralugit inuussutissarsiutinik ingerlatsiviit sinniisaat 70-it, politikerit, tusagassiortut aamma suliniaqatigiiffiit naalakkersuisutiguunngitsut NGO-nik taaneqartartut.

CSR nunatsinni pisariaqartinneqaqaaq.

- Kalaallit Nunaat isumaginninnikkut ineriartortitsinikkullu pisortat kisimik nammassinnaanngisaannik unammilligassaqaqaaq. Suliaq artornassaaq, taamaammat suleqataasinnaasut tamarmik atorfissaqartinneqarput, Martin Kviesgaard, Grønlandsbankenip pisortaa, CSR Greenlandimilu siulittaasumut tulliusoq oqarpoq.

Inuussutissarsiutinik ingerlatallit immikkut akisussaaffeqartut aamma erseqqissaatigineqarpoq.

- Kalaallit Nunaanni ajornartorsiutit nunani allanisut iinnarput, kisianniuna inuiaqatigiit ikinnerisa piviusut imminnut qaninnerulersittaraat, Henrik Leth, Kalaallit Nunaanni Sulisitsut Peqatigiiffianni pisortaq aamma CSR Greenlandimi siulittaasoq oqarpoq.

CSR Greenlandimi suleqataapput Grønlandsbanken, Air Greenland, Poyal Arctic Line, Sulisitsisut Peqatigiiffiat GA aamma Kompetencekompagniet.

CSR Greenland pillugu unnugu radioavisimi tusagaqarnerusinnaavusi.