Sulisoqarnikkut pitsannguallaat annikitsuinnaq

Utoqqalinersiuteqalernissamut ukiutigut killigititaq 2009-mi 63-iniit 64-inut qaffanneqarpoq, malitsigisaanillu akissarsiortut tunisisullu 2009-mi 29.524-inngorlutik, tassa 198-inik amerleriarlutik.

Qaffariarneq 0,7 procentiusoq annikitsuinnartut nalilertariaqartoq, Naatsorsueqqissaartarfiup saqqummersitaani atuarneqarsinnaavoq.

Kommunit sissamat akornanni Kommune Kujalleq kisermaajulluni 2009-mi akissarsiortoqarnikkut tunisisutigullu annikilleriarnermik nalaataqarpoq. Taamaalilluni ukiumut 85-inik ikileriarfiuvoq, procentinngorlugu 2,4-nik.

Kommunerujussuit sinneri sulisoqarnikkut annertugisassaanngitsumik siuariaallaffiupput. Kommuneqarfik Sermersooq tamatumani siuariarfiunerpaavoq, tassani 214-inik siuariartoqarmat, procentinngorlugu 1,8.

Utoqqalinersiuteqalernissamut ukiutigut killigititaq naalakkersuisut siuliinit, Siumumit siulersorneqartunit, qaffanneqarpoq.

Aleqa Hammondip taamanikkut Ilaqutariinnermut Eqqartuussiveqarnermullu Naalakkersuisuusup utoqqalinersiaqartarneq pillugu aaqissuusseqqinneq Inatsisartuni akuersissutigitippaa.

- Utoqqalisartut kingusinnerusukkut utoqqalinersiaqartalerneranni anguniarneqarpoq sivisunerusumik suliffimmiittalernissaat, taamaalilluni Nunatta karsianut aamma iluaqutaalersussaassalluni, Aleqa Hammond taamani taama oqarpoq.

Utoqqalinersiuteqalernissamut ukiutigut killigititaq 2010-mi januaarip aallaqqaataani 65-inut qaffanneqaqqippoq.

Kalaallit Nunaanni agguaqatigiissillugu inuusarnerup sivisussusia 2008-mi 66,6-iuvoq.