Sulisoqarnermut inatsisissaq partiinit arlalinnit akuerineqanngilaq

Naalakkersuisut sulisoqarnermut akitsuummik nutaamik inatsisiliorniarput. Aningaasat ilinniartitaanermut piginnaasanillu ineriartortitsinermut atorneqassapput. Inatsit akuerineqassaguni atuutilernini ilutigalugu Inuussutissarsiutitigut ilinniagaqarnermut sulisitsisut akiliutaat atorunnaarsinneqassaaq.

Inatsilli siunnersuutigineqartoq partiinit arlalinnit akuerineqanngilaq.

Sulisoqarnermut akitsuut aningaasaqarnermut naalakkersuisup inatsisartunut saqqummiuppaa. Inuussutissarsiutitigut ilinniagaqarnermut sulisitsisut akiliutigisartagaat 0,9 procentiusoq assigalugu sulisitsisut akissarsiarititat katinnerannit akiliuteqartassapput. Akitsuut nunatta karsianut ukiumut 57 millioni koruuninik isertitsissutaasassaaq. Aningasat inuussutissarsiornermi ilinniartitaanermut atorneqartussatut naatsorsuutigineqarput.

Siunnersuut demokraatinit isumaqatigineqanngilaq, isumaqaramik sulisitsisut aningaasat sumut atorneqarnissaanut sunniuteqarsinnaajunnaassasut. Naalakkersuisooqataasunit Atassutikkormiunit aamma tamanna ernummatigineqarpoq.

-Taakku aningaasat aqunneqarnerat akiliuteqartuninngaanniit annertuumik sunniuteqarfigineqarnissaat pingaartorujussuartut Atassuminngaanniit isumaqarfigivarput. Sulisitsisut taakkuupput sulisorisamik suut pikkoriffiginerusariaqarnerannik ilisimasaqarnerusut. Taamaattumik piffissap ingerlanerani aningaasat nunatta karsianut isertartut toqqaannartumik aningaasartuutinut allanut akulerutiinnannginnissaat qularnaarniarlugu pingaartutut isigaarput ersarivissumik maleruagassanik sanasoqareersimanissaa, Atassummi gruppimi siulittaasoq Augusta Salling oqarpoq.

Aningaasaqarnermut naalakkersuisup Josef Motzfeldtip partiit ernumanerat pissutissaqannginnerarpaa, sulisitsisullu aningaasat sumut atorneqartarnissaannik aalajangeeqataasassanerarlugit:

-Sulisitsisut sulinermut inuussutissarsiuteqartut kattuffiisa soqutiginninnerat najoqqutaralugu aningaasat qanoq sulisumik pikkorissarnissaannut atorneqarsinnaaneranik sunniuteqarsinnaanerat naalakkersuisuninngaanniit mattunneqanngilaq, tusarniaavigineqartuarnissaallu aamma mattunnagu, Josef Motzfeldt oqarpoq.

Sulisitsisut inuussutissarsiutitigut ilinniagaqarnermut akiliutigisartagaannit 12 millioni koruuninik annertuneruvoq, tassani aalisartut taxartitsisullu akitsuummi akileeqataasalertussaammata.

Aalisartut akileeqataasalernissaat Kattusseqatigiit partiiannit akerlilerneqarpoq.