Sulisitsisut: Ukiortaami oqalugiaataa erseqqinngilaq
Aningaasat siunissami atorluarnerusariaqarput. Taamattumik suliffeqanngitsut siusinaartumillu pensionisiallit amerlassusaat appasissumiitinniarneqartariaqarput.
Aleqa Hammondip ukiortaami oqalugiaatimini suliffeqanngitsut siusinaartumillu pensionisiallit, tamarmik katillutik 6.700-iusut, ikilisinniarlugit sakkortunerusumik polikkeqalernissaa siunniuppaa.
- Inuiaqatigiinni sanngiitsortavut ikiussavavut. Siusinaartumillu pensionisiaqartut amerlassusaasa appasissumiitinnissaat, aamma innuttaaqatitta sapinngisamik amerlanerpaat ikiorsiissutinik pisartagaqarnermit suliffeqarnermut utertinnissaat, suliassaavoq imaannaanngitsoq, Aleqa Hammond oqarpoq.
Taassuma oqaatsit atugai malillugit suliffeqanngitsut taamaasilluni ikilisinniarlugit aaqqissuusseqqinneq aallartinneqalersoq ilimanarsivoq. Naalakkersuisut akileraarutitigut sulinermullu aaqqissuusseqqinnginneranni Aleqa Hammond pingaartitanik tunngavilimmik oqallinnermik immaqa aallartitsiniarpoq.
Siumup siulittaasuata suliffeqanngitsut ikilisapallanniarlugit nalunaarnera GA-p iluarisimaarpaa. Inuiaqatigiinni 6.700-t suliffeqanngitsut, siusinaartumik pensionisiallit aamma suliffeqanngitsut assigiinngitsunik peqquteqarlutik kommunip neqeroorutaanik atuinngitsut amerlavallaarujussuarput, uffa aamma nunanit allanit sulisussanik tikisitsisoqartartoq, GA-p pisortaa Brian Buus Pedersen isumaqarpoq.
- Suliffeqanngitsut sulilertinissaat pingaartorujussuuvoq. Tamannali tigussaanngitsumik oqaatigeriarligu tulliani erseqqittorujussuarmik politikkikkut aaqqissuusseqqinniarluni oqaaseqarluni, anguniakkamut akerliusumik. taama imminut aporaattoqarnera politikkerit paasisariaqarpaat, Brian Buus Pedersen oqarpoq.
Taassuma sulinermut inuussutissarsiornermullu imminut ataqatigiittumik politikkeqannginnerarpaa, assersuussiorlunilu.
- Suli naluneqartunik aaqqissuusseqqinniarput, suliffeqanngitsut ikilisarniarlugit. Taamaaliorniarput ilinniarneq qaffassarlugu. Anguniagaq pingaartoq qangalilu anguniarneqartoq GA-mit isumaqatigaarput. Aappaatigulli anguniakkat aalisarnermut politikkikkut ilaatigut akiorneqarput, Brian Buus Pedersen oqarpoq.
Aalisarnermut politikkisaq Aleqa Hammondip ukiortaami oqalugiaatimini saqqummiussaa Brian Buus Pedersenip pivaa. Naalakkersuisut qaammatit qulini naalakkersuisuunerminni akileraarutit piumasaqaatillu sulisitsisunut qaffanneqartut aamma oqaatigaa. Sulisitsisut killilersorneqarpallaarpata suliffeqanngitsut amerlinerulissasut Brian Buus Pedersenip ernumatigivaa.
