Sulisitsisut sulisut akileraarutaat tigummiinnarsimavaat

Aningaasat 325 aamma 350 millionit koruunit akornannik amerlassusillit Nunatta karsiani amigaatigineqarput, sulisut akileraarutaat sulisitsisut tigummiinnarsimammatigik. Taakkua Aningaasanut inatsimmi meeqqanut inuusuttunullu atugassiissutigineqartut marloriaataattut amerlassuseqarput.

Aningaasat amigaatigineqartut qanoq matussuserneqarnissaat suli ersernerluttoq, aningaasaqarnermut naalakkersuisup Per Berthelsenip oqaatigaa. Tassami akileraartarnermut qullersaqarfiup qaammatini tulliuttuni qanoq amerlatigisunik akiilisitsisinnaanera apeqqutaassammat.

- Aallaqqaammut qanorpiaq pisoqarnersoq takoqqaartariaqarparput, aningaasatigulli ajornartorsiornerup nunatsinnut sunniuteqarnissaa pareersimaffigisariaqarparput, tassami suliffeqarfinnik matuinnartariaqalersoqarsinnaammat. Taakkumi akileraarutinik akiligassaannik akiliisinniarsinnaanngilavut, Per Berthelsen Radioaviisimut oqarpoq.

Taassuma akileraarutitigut isertinngitsuukkat patsisigalugit peqqinnissamik suliaqartut, atuarfeqarfik imaluunniit allarluinnarmi sipaarniartoqartariaqassanersoq oqaatigisinnaanngilaa.

- Aningaasat qanoq amerlatigisut pineqarnersut paasinissaat utaqqeqqaartariaqarpara, aningaasaqarnermut naalakkersuisoq oqarpoq.

Manna tikillugu akileraartarnermut qullersaqarfiup sulisut nutaat arfinillit, sulisitsisunut 350 millionit koruuninik akiliisitsiniartussat atorfinitsissimavai.