Sulisitsisut peqatigiiffiata ukiortaami pilluaqqussutaa
Kalaalinngorsaaneq tassaasariaqarpoq naalakkersuinikkut anguniagassanik isumaliorsinnaaneq takorluugaqarsinnaanerlu, taakkulu atorfilinnit pikkorissunit aalajaatsunillu suminngaanneeraluartunilluunniit piviusunngortinneqarsinnaassapput. Sulisitsisut Peqatigiiffiat GA ilaatigut taama allappoq.
Ileqquusut malillugit ukiortaamut appakaannermi kissaatigisat saqqummiunneqartarput, uagut ukioq manna kissaatigaarput SIK isumaqatigiissuteqarfigisinnaassallugu. 2006-imi marsimili namminersortuni sulisunut 5.000-iusunut isumaqatigiissutit atuuttussat isumaqatiginninniutigilerpavut, isumaqatigiissutit nutaat 2006-imi apriilip aallaqqaataani atuutilereertussaagaluarput.
2003-mi isumaqatigiinniarnerni aningaasaateqarfinnut akiliisarnivut unitsippavut, soorunamilu kattuffittut akisussaassuseqartutut akiliisarnerit aallarteqqinnavianngilavut, sullivinnimi namminersortuni sulisut 95 procentii SIK-mut ilaasortaanngillat, taakkulu peqatigiiffimmut ilaasortaaffigerusunngisaannut akiliisarnissaat isumaginianngilarput.
Matumani erseqqissarneqassaaq SIK akissarsiatigut atugassarititaasutigullu pisortanut isumaqatiginninniarnermi angusarineqartut assingannik neqeroorfigigaluaratsigu, tassa 8 procentinik, taassumallu saniatigut namminersortuni sulisut sinniisaasa ilinniartinneqarnissaannut akiliinissamik qularnaveeqqusiiniarluta. Tamannali iluatsinngilaq.
Maannali isumaqatigiissitsiniarnissamik suliassaq neriulluarfigaarput, tassami SIK isumaqatigiissummik pingaarnermik unioqqutitsisutut suliassap ingerlariaqqinnissaanik unitsitsinera naammaginanngilluinnartoq qaangerneqartariaqarpoq.
Sulisitsisut Peqatigiiffiat GA kattuffittut tassanilu suliffeqarfiit ilaasortaasut 350-it ajuusaarutigaat sulisorpassuit akissarsiassamik qaffanneqarnissaraluat utaqqisariaqarmassuk. Ajoraluartumilli GA isumaqatigiissutitigut pituttoqqavoq eqqartuussisutigullu aalajangiinissaq utaqqisariaqarlugu.
Naggataatigut danskip isumalioqqissaartartup Søren Kierkegaardip oqaasii naggasiutigineqarput imaattut: Inuuneq taamaallaat kingumut qiviarnikkut paasineqarsinnaavoq, kisiannili siumut isiginikkut atorneqartariaqarluni.
