Sulisitsisut Peqatigiiffiat uukapaatitsinianut mianersoqqusivoq

Sianigitsi! Ussassaarusiorlutik uukapaatitsiniartartut Nunatsinni aallartissimapput. Kalaallit Nunaanni Sulisitsisut Peqatigiiffiat ilaasortaminut mianersoqqusilluni taama allappoq.
Allattoq Jens Thorin
juulip 02-at 2009 09:37

Suliffeqarfiup tusaamasapiluup, Dansk Internet Registerip, Nunatsinni suliffeqarfinnut assigiinngitsunut paasissutissaatiminik iluarsaaqqusilluni saaffiginnissutaa, tamatumunnga peqqutaavoq.

Suliffeqarfiup tyskinit pigineqartup periaasii pillugit Danskit atuisunut ombudsmandiata oqaaseqaataa, Sulisitsisut Peqatigiiffiata ilaasortaminut nassiussuuppaa.

Mianersoqqussummi inuussutissarsiortut eqqumaniarluaqqullugit kaammattorneqarput, tassami uukapaatitaaneq akisoorujussuanngorsinnaammat.

Mianersoqqussummi oqaluttuarineqarpoq, kukkunersiuinissamik kajumissaarut takoqqusaarusiornissammillu neqeroorutit Dansk Internet Register akuleriisittarai, taamaalillutik inuussutissarsiortut takoqqusaarummik 7.000 koruuninik nallilimmik pisinertik takkuitsoortarlugu.

- Dansk Internet Registerip pisisussarsiornermini periaasiinut, kisiartaanngitsunut, tunngasunik naammagittaalliutinik amerlasuunik tigusaqarnikuuvugut, atuisunut ombudsmandi Henrik Øe siorna mianersoqqussummini allappoq.

Tassalu suliffeqarfik Tysklandimeersoq Nunatsinni inuussutissarsiortunut kajumissaarivoq, suliffiutiminnut paasissutissat allattorsimaffiutiminniittut kukkunersioqqullugit iluatsillugulu takoqqusaarummik piseqqullugit.

- Taamaammat sianigitsi! Immersugassaq immersorussiuk uukapatitaaqinaasi, Sulisitsisut Peqatigiiffiat mianersoqqusivoq.