Qulaarpaa Sulisitsisut Peqatigiiffiat: KNR ussassaaruteqarunnaarli

Tusagassiuutit amerlanerugaangamik pitsaanerusarput. Kalaallit Nunaanni Sulisitsisut Peqatigiiffiat taama isumaqarpoq, taakkulu KNR pileriasaarutaarunnissaa kissaatigaat, taamaalillunimi tusagassiuutit namminersortut aningaasaateqarnerulissapput.
Lars Krogsgaard-Jensen Assi © : KNR
februaarip 24-at 2015 16:03

- KNR pilerisaarutinit isertitaarunnissaa kissaatigaara, Lars Krogsgaard-Jensen, Sulisistsisut Peqatigiiffianni inatsisilerinermut siunnersorti IT-milu, attaveqaqatigiinnermi tusagassiutinilu suliallit ataatsimiitsitaliaanni allatsi, oqarpoq

Aviisit ataatsimik amerlineqassapput

Tusagasiuutit pillugit isumaliutissiissummi 2010-meersumi aviisit ataatsimik amerlinissaannut aningaasanik tapersiissutissanik nassaartoqarnissaa tunngavilersuutigineqarpoq, tamannalu piviusunngussappat aviisinut pilerisaarutinit isertitat amerlisariaqarput.

- KNR pisortanit aningaasalersorneqarnissaa pitsaasinnaasoq takusinnaavara, taamaalillunimi pilerisaarutinit isertitaqartariaqanngilaq, Lars Krogsgaard-Jensen oqarpoq.

Aamma atuaruk Nunatsinni tusagassiuutit sammineqassapput

Aningaasanut inatsimmit aningaasaliisoqartariaqarpoq

KNR pilerisaarutinit isertitanit ilaatigut aningaasalersorneqarpoq. Aningaasat KNR pilerisaarutaarutissappat amigaataasussat.

- Taama aaqqiissagaanni aningaasanut inatsimmi aningaasat nassaarineqartariaqarput, inatsisilerinermut siunnersorti oqarpoq.

Naalakkersuisulli erseqqissareerpaat KNR-imut tapiissutit annertusineqarnavianngitsut. Aningaasartuutilli amerliartorput taamaammallu nutaamik pilersitsinerit allatut aningaasalersorneqartariaqarput KNR-ip maannamut suliai annikillinianngikkunik.

Aamma atuaruk Nunaqarfimmiut tusagassiuutinit sammineqarnerusariaqartut

Tusagassiuutit amerlanerit kissaatigaat

Tusagassiuutit amerlanerunissaat pisariaqartoq Sulisitsisut Peqatigiiffiata erseqqissarpaa.

- Assigiiaammik suliallit akornanni unammillerneqarnissaa Sulisitsisut Peqatigiiffiata kissaatigaa. Tusagassiuutit amerlaneruppata tusagassiortunik najuuttoqarneq annertunerulissaaq, Lars Krogsgaard-Jensen oqarpoq.