Sulisitsisut Peqatigiiffiat GA: Aatsitassanut inatsit paatsuunganarpoq

Aatsitassanut ikummatissanullu inatsit paatsuunganarpallaarpoq, paatsuunganartoqartuassappallu kalaallit suliffeqarfiinut siunissami iluaqutaanavianngilaq. Sulisitsisut Peqatigiiffiata GA-p pisortaa Henrik Leth taama oqarpoq.
Allattoq Mads Lynge
aggustip 30-at 2011 16:59

- Aatsitassat pillugit inatsit arlalitsigut naammaginanngilaq paatsuunganartoqarsinnaallunilu. Suliffeqarfik sulisinneqartussaq nunatsinninngaanneersuussanersoq nunatsinninngaanneersuussannginnersorluunniit iluamik ersarinngilaq. Allassimavoq kalaallit suliffeqarfiutaat salliutinneqassasoq, qanorpiarli tamanna isumaqarnersoq allassimanngilaq. Tamanna paatsuunganarsinnaammat iluarsisariaqartut isumaqarpugut, GA-p pisortaa Henrik Leth oqarpoq.

Aatsitassanut ikummatissanullu inatsimmi kapitalit tallimaanni, misissuineq aamma qalluineq pillugu §18-imi immikoortoq 2-mi ima allassimavoq:

"Piginnaatitsissummik pigisaqartup (...) piiaanissamullu akuersissummik tunineqarsimasup suliassanik isumaqatigiissuteqarnerni, pilersuinerni kiisalu kiffartuutinik sullinneqarnerni suliffeqarfiit Kalaallit Nunaanneersut atussavai. Suliffeqarfiilli allat atorneqarsinnaapput, Kalaallit Nunaanni suliffeqarfiit teknikkikkut niueqatigiinnikkulluunniit unammillersinnaassuseqanngippata."

Suliffeqarfissuit nunanit allaneersut Kalaallit Nunaannik soqutiginninnerulerpata, kalaallit suliffeqarfiutaat sunniuteqarnerusinnaanissaat annikillissasoq, GA-p aarleqqutigaa.

- Uppiasuunngilagut. Kalaallimmi Nunaanni aatsitassarsiorneq ineriartorlualerpat nalunngilarput suliffeqarfiit nunanit allaneersorpassuit Kalaallit Nunaanni suliaqalissapput. Suliffeqarfiit taakku Nunatsinni suliffeqarfiit atugaasa assinginik periarfissaqartariaqarput, isumaqarpugummi suliffeqarfissuit taakku kalaallit suliffeqarfiutaannut aamma iluaqutaassasut. Suliffeqarfiit tamarmik taamaammat assigiimmik periarfissaqartariaqarput, Henrik Leth oqarpoq.

GA-p Aatsitassanut inatsimmik isornartorsiuinera pillugu Naalakkersuisunut ilaasortaq Ove Karl Berthelsen ima oqarpoq:

- Inuiaqatigiit tamakkiisumik qanorlu annertutigisumik suliffeqarfinnit nutaanit ineriartorfiusussanit sapinngisamik annertunerpaamik iluaqutissarsisinnaanersut, Naalakkersuisunit ujartortuarparput, tassa aningaasatigut aammalu inuiaqatigiit siuariartornerannut qanoq tunniussisinnaatiginersut, Naalakkersuisuniit soqutigisaraarput, Inuussutissarsiornermut Suliffeqarnermullu Naalakkersuisoq Ove Karl Berthelsen oqarpoq.