Sulisitsisut Peqatigiiffiannut ilaasortaajunnaartut

Sulisitsisut Peqatigiffiannit sullinneqarnertik naammaginagu peqatigiiffimmit anipput:

Sanasut namminersorut tassaapput Nanoq Byg, Tømrerfirmaet Hansen kiisalu Nuuk Byg.

Suliffeqarfiit annerit Sulisitsisut Peqatigiiffiata pingaartinnerugai sanasut namminersortut taakku pingasut oqaatigaat, ilaasortaajumajunnaarlutillu:

- Suliffeqarfiit minnerit maaniittut iluamik sullinneqanngillat. Sulisitsisut Peqatigiffiat arlaleriarluta saaffigisaraluarparput suliariumannittussarsiuussinermi periaatsit iliuuseqarfigeqqullugit. Taakkuali oqarput iliuuseqarfigisinnaanagit, taamaammat ilaasortaajunnaarnissarput aalajangiupparput, Bjarne Høy, Nuuk Bygiminngaanneersoq Radioaviisimut oqarpoq.

- Suliassaqanngikkutta, suliariumannittussarsiuussinernullu peqataasinnaanngikkutta sulisunik soraarsitsisariaqassaagut, Bjarne Høy oqarpoq, Sulisitsisullu Peqatigiiffiata suliffeqarfiit annerit nunanilu allaneersut sullikkusunnerusarai oqaatigalugu.

Pissutsit aaqqiiviginiarlugit qinikkat iliuuseqartariaqartut taassuma aamma oqaatigaa.

Suliariumannittussarsiuussisarnerit qanoq isumagineqartarnersut qinikkat alaatsinaattariaqaraat sanasut namminersortut minnerit ujartorpaat.

- Namminersorlutik Oqartussani kommuuninilu atorfillit suliariumannittussarsiuussinerni periutsit eqqumaffigisariaqarpaat. Suliffeqarfiimmi nunanit allaneersut salliutinneqartuaannassappata suliffeqarfiit Nunatsinneersut suliassaqartinneqarnavianngillat, Nuuk Bygimeersoq oqarpoq.

Suliffeqarfiit nunanit allaneersut Nunatsinneersunik sulisoqarpiarneq ajornerat taassuma aamma uparuarpaa. Sanasut namminersortut Nuummeersut suliassinneqanngiinnarpata ilinniartunik aamma tigusisinnaaneq ajornerarpai, akerlianillu sulisunik soraarsitsiortortariaqarnerarlugit.

Sulisitsisut Peqatigiiffiata pisortaata Henrik Lethip sanasut namminersortut ataasinngorpat ataatsimeeqatiseriniarpai, pissutsit ullumikkut atuuttut ataatsimiinnermi oqallisigineqassallutik.