Sulisitsisut: Naalakkersuisut siunnersuutaat nutaartaqarujussuanngillat

Inuussutissarsiutitigut ilinniartitaanerup allangortiteriffigineqarnissaanut Naalakkersuisut pilersaarutaat maanna tusarniaassutigineqartut Sulisitsisut Peqatigiiffiata ilassilluarpai, siunnersuutit ilaat ilalerpai allalli aamma apeqquserlugit.
Allattoq Thora H. Nielsen
februaarip 11-at 2014 10:44

Kisitsisit nutaat naapertorlugit inuussutissarsiutitigut ilinnialerlutik aallartittartut affai sinnerlugit, tassalu 55 %-ii ilinniarnerminnik naammassinngitsoortarput, taakkuli 40 %-ii kingusinnerusukkut aallarteqqissimanngikkunik allamut saallutik ilinnialersarput.

Taamaattumik ilinniakkaminnik naammassisartut amerlanerulernissaat kiisalu ilinnialersartut inuussutissarsiutigiligassagassaannik aallaqqaammulli eqqortumik toqqaasinnaalernissaat aqqutissiuunniarneqarpoq.

Assersuutigalugu inuussutissarsiutitigut ilinniartitaanernut ilinnialinnginnermi tunngaviusumik ataatsimoortumik ilinniagaqaqqaartoqartalernissaa Naalakkersuisut siunnersuutigaat.

Ukiumi ataatsimi tassani ilinniareerluni angusigaanni aatsaat inuussutissarsiutitigut ilinniarusutamut aallartittoqarsinnaalernissaa isumaliutigineqarpoq.

Tamannali Sulisitsisut Peqatigiiffiata apeqquserpaa eqqartorluagassaanerarlugulu.

- Tunngaviusumik ataatsimoortumik ukiumi ataatsimi ilinniarsinnaalernissamik periarfissiinissaq qanoq aaqqissuunneqassanersoq apeqqutaavoq, ilinniarnerimmi aallaqqaataat qiviassagaanni amerlanertigut sapaatip-akunneri 50-it siulliit ilinniarfimmi ingerlanneqartareerput. Taamaattumik tunngaviusumik ataatsimoortumik ukiumi ataatsimi ilinniartitsisoqartalissappat allannguuteqartoqangaarnavianngilaq. Karsten Lyberth-Klausen oqarpoq.

Tassunga taarsiullugu ullumikkutut sapaatip-akunneri 20-t tungaviusumik ilinniartitsisarnerit pinnagit sapaatip-akunnerinut 40-nut aaqqissuunneqarnissaat tulluarnerutippai, taamaaliornikkut atuagarsornikkut artorsartut malinnaalluarsinnaanngorniassammata.

Suliffeqarfinni sungiusarnissamut tunngatillugu suliffeqarfiit sivisuumik isumaqatigiissusiortarnissartik aamma tunuarsimaarfigisarpaat, Naalakkersuisut siunnersuutaat naapertorlugu sivikitsukullakkuutaanik sungiusaammik sulisitsinissamik isumaqatigiissusiortoqarsinnaalissaaq tamannalu Sulisitsisut Peqatigiiffiata ilalerpaa.